Ynglŷn â Grŵp Llandrillo Menai

Mae Aled Jones-Griffith wedi bod yn gweithio yn y sector addysg bellach ers dros bymtheg mlynedd: bu'n gyfarwyddwr cyfadran yng Ngholeg Menai ac yna'n Bennaeth Cynorthwyol yng Ngholeg Meirion-Dwyfor cyn cael ei benodi'n Bennaeth ar Goleg Menai a Choleg Meirion-Dwyfor yn 2018 ac yna yn Brif Weithredwr yn 2024.

Cyn ymuno â'r sector addysg bellach, gweithiodd Aled fel rheolwr mewn amryw o sectorau gan dreulio pedair blynedd yn Brif Weithredwr ar Ganolfan Iaith Genedlaethol Nant Gwrtheyrn. Gwasanaethodd hefyd ar Gyngor Cynulleidfa Cymru'r BBC am ddau dymor. Yn ystod y cyfnod hwn cafodd y fraint o draddodi darlith ar Hanes yr Iaith Gymraeg i'r Gymdeithas Smithsonian yn Washington DC.

Graddiodd Aled mewn Astudiaethau Amgylcheddol ym Mhrifysgol Bangor, ac ers hynny mae wedi mynd ymlaen i ennill Tystysgrifau Ôl-radd mewn Rheoli Cefn Gwlad a Datblygu Cymunedol.

Yn ogystal â'i swydd fel Pennaeth, mae gan Aled gyfrifoldeb cyffredinol ar draws Grŵp Llandrillo Menai am Ddysgu Oedolion yn y Gymuned. Mae hefyd yn cynrychioli GLlM ar Grŵp Rhanddeiliaid Sgiliau Ffilm a Theledu Cymru Greadigol a Grŵp Llywio'r Gogledd Creadigol.

Mae gan Aled ddiddordeb mawr mewn chwaraeon ac mae wedi cyfrannu i'w glwb pêl-droed lleol dros y blynyddol drwy wneud swyddi amrywiol. Mae'n cael pleser mawr o weld pobl ifanc yn cyflawni eu potensial ym mhob agwedd ar eu bywydau. Ei flaenoriaeth yw sicrhau eu bod yn cael y cyfleoedd a'r gefnogaeth orau bosibl i lwyddo.

Graddiodd Siôn yn wreiddiol yn 2001 gyda gradd anrhydedd dosbarth cyntaf mewn peirianneg electronig o Brifysgol Bangor cyn symud ymlaen i gwblhau doethuriaeth mewn dynameg anhrefnus laserau lled-ddargludyddion.

Ar ôl gweithio am gyfnod byr fel athro ffiseg ar Ynys Môn, aeth Siôn ymlaen i arwain nifer o adrannau STEM mewn coleg chweched dosbarth yng Ngogledd Swydd Lincoln cyn symud ymlaen i fod yn gyfarwyddwr gweithredol ansawdd ac arloesedd gyda grŵp coleg addysg bellach yng Ngogledd Ddwyrain Swydd Lincoln.

Dychwelodd Siôn i Gymru yn 2016, gan ymuno ag Estyn fel AEM yn gweithio ar draws y sectorau ôl-16 o addysg bellach, dysgu oedolion yn y gymuned, dysgu seiliedig ar waith, a dysgu yn y sector cyfiawnder. Yn ystod ei gyfnod gydag Estyn bu gan Siôn gyfrifoldeb fel un o’r arweinwyr sector ar gyfer addysg a hyfforddiant ôl-16, arweiniodd adolygiad thematig Estyn o bartneriaethau ôl-16 ledled Cymru, a bu’n cyflawni amryw o rolau arweiniol eraill gan gynnwys arwain adroddiad blynyddol Estyn ar y cyd. Yn 2021-2022 bu Siôn yn gweithio’n uniongyrchol i Lywodraeth Cymru fel rhan o secondiad 12 mis i reoli a chydlynu adferiad addysg a hyfforddiant ôl-16 ledled Cymru yn sgil y pandemig COVID-19.

Daeth Siôn yn Bennaeth Coleg Menai a Choleg Meirion-Dwyfor ym mis Awst 2024.

Mae Paul Flanagan, arweinydd sydd â phrofiad helaeth ac ymrwymiad cryf i ragoriaeth mewn addysg, wedi'i benodi yn Bennaeth Coleg Llandrillo. Ers ei benodiad ym mis Awst 2024, mae Paul wedi bod yn sbardun i nifer o fentrau strategol Grŵp Llandrillo Menai, yn enwedig o ran gwella deilliannau i ddysgwyr, hyrwyddo diwylliant o gynhwysiant, a meithrin arloesedd ar draws cwricwlwm a gwasanaethau’r coleg.

Mae'n meddu ar gefndir cyfoethog mewn addysg bellach ac addysg uwch mewn lleoliad addysg bellach. Arweiniodd Paul adrannau cwricwlwm amrywiol yn llwyddiannus a bu mewn nifer o uwch swyddi arweinyddiaeth. Canolbwyntiodd yn gyson ar wella deilliannau dysgu ac addysgu yn y swyddi hyn. Mae ei arweinyddiaeth wedi bod yn ganolog wrth gyflwyno dulliau addysgu arloesol wedi'u seilio ar dystiolaeth a datblygu partneriaethau cadarn gyda chyflogwyr lleol, prifysgolion a sefydliadau cymunedol.

Yn frwd ynghylch datblygiad proffesiynol ac yn eiriolwr cryf o blaid y Gymraeg a diwylliant Cymru, mae Paul wedi ymrwymo i greu amgylchedd dysgu deinamig, sy'n canolbwyntio ar y myfyriwr ac yn blaenoriaethu rhagoriaeth academaidd a thwf personol.

Graddiodd Paul mewn addysg o Brifysgol De Cymru ac mae wedi derbyn dau Ddiploma Ôl-raddedig mewn Addysg. Cafodd Paul yrfaoedd arweinyddiaeth llwyddiannus ym maes gofal cymdeithasol a busnes cyn dod i'r sector addysg bellach. Mae wedi ymrwymo'n llwyr i feithrin diwylliant cydweithredol a pherfformiad uchel ymhlith staff a myfyrwyr fel ei gilydd, gan sicrhau bod Coleg Llandrillo yn parhau i ffynnu a bodloni anghenion esblygol ei ddysgwyr a'r gymuned ehangach.

Astudiodd Sharon Bowker ieithoedd a'r gwyddorau cyn cymhwyso fel cyfrifydd rheoli siartredig (CIMA) a bu'n gweithio i gwmnïau gweithgynhyrchu mawr fel BASF a Tetra Pak, cyn symud i'r sector addysg yn 2005.

Mae Sharon wedi bod mewn nifer o uwch swyddi yn y sectorau Academiau ac Addysg Bellach yn Lloegr, gyda chyfrifoldeb am wasanaethau cefnogi fel ystadau, arlwyo, marchnata, Adnoddau Dynol, cyllid, Technoleg Gwybodaeth, gweinyddu a chyllido. Mae ganddi brofiad ym maes uno colegau ac o reoli datblygiadau cyfalaf ar wahanol safleoedd.

Ymunodd Sharon â'r Grŵp yn 2022 fel Uwch Gyfarwyddwr y Gwasanaethau Corfforaethol.

Mae James Nelson yn gyn-fyfyriwr o Goleg Llandrillo. Astudiodd am Ddiploma Cenedlaethol mewn Astudiaethau Busnes yma cyn mynd ymlaen i Goleg Polytechnig Manceinion a graddio mewn Busnes a Chyllid.

Ar ôl graddio, penodwyd James yn Ddarlithydd mewn Technoleg Gwybodaeth. Enillodd achrediadau MCSE a CCNA gan ddatblygu rhaglenni Microsoft a Cisco arloesol ar gyfer Addysg Uwch.

Daeth James yn Rheolwr Ansawdd yng Ngholeg Llandrillo, ac yna fe'i penodwyd yn Gyfarwyddwr Ansawdd a Chwricwlwm. Yn y swydd hon arweiniodd y prosesau ansawdd, cynllunio a datblygu staff oedd ynghlwm â'r uno â Choleg Meirion-Dwyfor.

Mae James yn Adolygydd Cymheiriaid i'r Asiantaeth Sicrhau Ansawdd ac arweiniodd y Grŵp drwy Adolygiad Addysg Uwch yn 2016. Yn yr adolygiad hwn cafodd y Grŵp ei gymeradwyo am wella cyfleoedd dysgu i fyfyrwyr a thynnwyd sylw at 6 enghraifft o arfer da.

Yn 2017, penodwyd James yn Uwch Gyfarwyddwr Gwasanaethau Academaidd gyda chyfrifoldeb trawsgolegol am Sgiliau, Ansawdd a Pherfformiad, Cynllunio'r Cwricwlwm, Cymorth Dysgu, Marchnata, Gwasanaethau i Ddysgwyr a Llyfrgelloedd.

Fel enwebai, yn 2017 arweiniodd James y Grŵp drwy Arolygiad AB llwyddiannus oedd yn cynnwys 8 dyfarniad Rhagorol, 7 dyfarniad Da a dwy astudiaeth achos o "arferion gorau'r sector". Mae James yn Arolygwr Cymheiriaid i Estyn ac wedi bod yn rhan o sawl arolygiad o Golegau AB a darparwyr Dysgu Seiliedig ar Waith.

Ar ôl graddio mewn Daearyddiaeth ym Mhrifysgol Cymru, Aberystwyth ac yna ennill MSc mewn asesu effeithiau amgylcheddol, dechreuodd Gwenllian ei gyrfa yn niwydiant olew a nwy'r Deyrnas Unedig. Ond maes o law, wrth i ffocws ei gyrfa newid, dychwelodd i ogledd Cymru.

Mae hi wedi bod mewn swyddi blaenllaw ym maes datblygu economaidd a rhanbarthol gan fod yn gyfrifol am y cyswllt rhwng diwydiant a llywodraeth mewn meysydd fel ynni, dur, dŵr a'r amgylchedd. Cyn ymuno â GLlM Gwenllian oedd Cyfarwyddwr OFWAT ar gyfer Cymru ac Ymgysylltu â'r Llywodraeth, a chyn hynny hi oedd Prif Swyddog Rhanbarthol Llywodraeth Cymru yng ngogledd Cymru. Trwy gydol ei gyrfa mae Gwenllian wedi hyrwyddo gweithio'n gydweithredol ar lefel ranbarthol a chenedlaethol.

Fel yr Uwch Gyfarwyddwr sy'n gyfrifol am Ddatblygiadau Masnachol mae Gwenllian â'i bryd ar ddefnyddio arbenigedd ac enw da Busnes@LlandrilloMenai i fanteisio ar bob cyfle ac i fynd i'r afael â'r heriau sy'n wynebu economi gogledd Cymru. Mae hi wedi ymroi i feithrin arloesedd a chefnogi busnesau mewn sectorau allweddol i ffynnu a llwyddo, tra hefyd yn hybu cenhadaeth y sefydliad i rymuso unigolion a busnesau i lawn gyflawni eu potensial. Yn ei swydd mae hi am adeiladu ar lwyddiant Busnes@LlandrilloMenai a sicrhau ei fod ar flaen y gad wrth gefnogi twf economaidd a ffyniant yng ngogledd Cymru.