BA (Anrh) Rheolaeth Lletygarwch TOP UP

Disgrifiad cwrs

Mae'r BA (Anrh) Rheolaeth Lletygarwch wedi'i ddyfeisio i'ch paratoi ar gyfer swydd ar unwaith ac i gael gyrfa lwyddiannus mewn rheoli lletygarwch. Mae'n rhoi cymysgedd o addysg academaidd a galwedigaethol ichi.

Mae sgôp eang y cwrs yn rhoi cyfle ichi ennill dealltwriaeth o holl elfennau allweddol y sector lletygarwch ac o arferion rheoli. Byddwch yn dysgu am letygarwch fel ffenomenon, ac yn edrych sut wnaeth y sector ddatblygu a thyfu. Byddwch hefyd yn edrych yn fwy penodol ar natur cwsmer-ganolog y diwydiant. Byddwch yn dysgu sut i ddeall ymddygiad cwsmeriaid a sut i werthuso gwasanaeth cwsmer.

Mae'r cwrs yn eich paratoi ar gyfer rolau rheoli drwy eich cyflwyno i theorïau a chysyniadau o amrywiol feysydd rheoli, gan gynnwys rheoli gweithredu, cyllid, adnoddau dynol a rheoli strategol. Byddwch hefyd yn dysgu am yr amgylchedd y mae busnesau'n gweithio o fewn iddynt, ac yn dod i ddeall sut y mae'r holl syniadau hyn yn uniongyrchol berthnasol i'r sector lletygarwch.

Byddwch yn datblygu eich gwybodaeth a'ch sgiliau mewn ystod o feysydd ac yn gwella eich capasiti i wneud dadansoddiad beirniadol, penderfyniadau a datrys problemau. Ynghyd â'r cipolwg a gewch i sut y mae'r diwydiant lletygarwch yn gweithio, bydd hyn yn helpu i'ch paratoi ar gyfer gyrfa reoli gyffrous.

Gwybodaeth uned

Am bob 10 credyd, dylai myfyrwyr ymgysylltu â thua 100 o oriau tybiannol o ddysgu. Bydd hyn oddeutu 30% o gyswllt dysgu uniongyrchol, 70% o ddysgu annibynnol i fyfyrwyr.

Mae'r cwrs yn cynnwys y modiwlau canlynol:

Lefel 6

Traethawd Estynedig (40 credyd, gorfodol)

Yn y traethawd estynedig, bydd myfyrwyr yn ymchwilio i bwnc y mae ganddynt ddiddordeb ynddo. Ar ôl cynnig teitl a chynnal adolygiad llenyddol, bydd myfyrwyr yn llunio traethawd estynedig/prosiect ymchwil. (Cynnig Ymchwil 10%, Traethawd Estynedig 90%)

Rheolaeth Strategol (20 credyd, gorfodol)

Nod y modiwl hwn yw datblygu ymwybyddiaeth o'r materion amgylcheddol mewnol ac allanol sy'n dylanwadu ar benderfyniadau strategol sefydliadau yn yr unfed ganrif ar hugain. Bydd myfyrwyr yn astudio ac yn meithrin sgiliau gwerthuso wrth ddefnyddio fframweithiau'n arf i wneud penderfyniadau strategol mewn amgylcheddau busnes. (Arholiad 50%, Traethawd 50%)

Moeseg yn y Diwydiant Digwyddiadau, Lletygarwch a Thwristiaeth (20 credyd, gorfodol)

Nod y modiwl yw archwilio a gwerthuso egwyddorion a damcaniaethau moesegol mewn cyd-destunau'n ymwneud â digwyddiadau, twristiaeth a lletygarwch. Bydd damcaniaethau'n cael eu trafod a'u gwerthuso er mwyn gweld eu gwerth i'r diwydiant digwyddiadau, twristiaeth a lletygarwch cyfoes. Yn ogystal, trafodir dylanwadau lleol a byd-eang er mwyn gweld pa mor bwysig yw cyfraniad y rhanddeiliaid gwahanol yn y cyd-destunau hyn. (Traethawd 50%, Seminar/Papur ymchwil 30%, Cyflwyniad 20%)

Materion Cyfoes yn ymwneud â Lletygarwch a Thwristiaeth (20 credyd, gorfodol)

Mae'r modiwl hwn yn archwilio'n feirniadol yr heriau mewnol ac allanol sy'n wynebu sefydliadau lletygarwch a thwristiaeth mewn cyd-destunau cyfoes. Bydd arwyddocâd ac effaith bosibl tueddiadau a materion cyfoes yn y sector yn cael eu dadansoddi a'u gwerthuso'n feirniadol. Yna bydd y datrysiadau sy'n anelu at reoli'r effeithiau posibl yn cael eu trafod ochr yn ochr â'r cyfiawnhad dros y datrysiadau hyn yng nghyd-destun sefydliadau. (Traethawd 40%, Astudiaeth Achos 60%)

Creu Profiadau ym maes Bwyd a Diod (20 credyd, gorfodol)

Nod y modiwl yw diffinio'r economi sy'n seiliedig ar greu profiadau ym maes bwyd a diod a dadansoddi'n feirniadol pam fod yr economi hon wedi dod i fod. Dadansoddir modelau traddodiadol o ymddygiad cwsmeriaid ochr yn ochr â modelau mwy cyfoes. Yn ogystal, bydd tueddiadau rhyngwladol ym maes bwyd a diod, cyfryngau cymdeithasol, marchnata a demograffeg-gymdeithasol yn cael eu gwerthuso. Bydd gwybodaeth yn cael ei chyfosod i lunio a chyflwyno cysyniad creadigol a dyfeisgar ar gyfer profiad bwyd a diod. (Traethawd 50%, Cynllun busnes 50%)