Tystysgrif Addysg Uwch mewn Arferion Gofal Iechyd

Cwestiynau Cyffredin am Dystysgrif Lefel 4 mewn Addysg Uwch: Arferion Gofal Iechyd (HCP)

Pwy gaiff wneud cais am y cwrs?
Mae cwrs y Dystysgrif AU mewn Arferion Gofal Iechyd (HCP) yn datblygu a gwella sgiliau Gweithwyr Cymorth Gofal Iechyd hyd at lefel 4, sydd un ai'n gweithio i'r Gwasanaeth Iechyd Gwladol neu'n gallu mynd ar leoliad gyda chyflogwr clinigol arall a gymeradwywyd.

Pa gymwysterau sydd eu hangen arnaf i wneud y cwrs hwn?
Mae meini prawf mynediad fel arfer yn gymhwyster galwedigaethol L3 neu ofynion cyfatebol eich gweithle. Mae Llythrennedd a Rhifedd yn rhan o'r cwrs, felly ni ofynnir am gymwysterau ffurfiol eraill. Yn ogystal, bydd angen i chi fod un ai'n gweithio mewn lleoliad clinigol addas, neu'ch bod yn gallu cael eich cefnogi gan leoliad o'r fath. Mewn rhai achosion, gallwn helpu yn hyn o beth.

Ydw i yn y rôl iawn i wneud y cwrs hwn?
Os oes gennych ddiddordeb mewn datblygu eich gyrfa fel gweithiwr cymorth gofal iechyd ymhellach. Nod y cwrs hwn, yw cynyddu gallu clinigol a meithrin sgiliau trosglwyddadwy fel hunanymwybyddiaeth, dysgu hunangyfeiriedig drwy adfyfyrio, empathi ac ymchwil mewn awyrgylch gefnogol. Mae'r cwrs yn darparu cyfleoedd dysgu i'r rhai sy'n gweithio mewn lleoliadau Gofal Iechyd, fel eu bod yn gallu adfyfyrio ar eu perfformiad a'i ddadansoddi'n feirniadol, datblygu arferion sy'n seiliedig ar dystiolaeth, a chael cyfleoedd i ledaenu arfer da.

Sut mae gwneud cais?
Dylai staff y Bwrdd Iechyd wneud cais drwy Adran Hyfforddi'r Bwrdd Iechyd. Dylai staff practis meddyg teulu sy'n gweithio mewn practis a reolir gan BIPBC hefyd wneud cais drwy'r Bwrdd Iechyd. Gall staff yn y sector iechyd a gofal cymdeithasol nad ydynt yn gweithio i’r Bwrdd Iechyd, ond sy’n bodloni’r gofynion mynediad, wneud cais yn uniongyrchol i’r coleg.

Faint mae'r cwrs yn ei gostio?
Ariennir ffi'r cwrs yn llawn gan Addysg a Gwella Iechyd Cymru (AaGIC). Ni chodir tâl ar fyfyrwyr na'u cyflogwyr yn uniongyrchol. Mae costau'n gysylltiedig â'r cwrs megis teithio ac amser posibl wedi eu rhyddhau o'r gwaith nad yw AaGIC na'r coleg yn eu talu.

Pryd mae'r cwrs yn dechrau ac ar ba ddyddiau mae'r cwrs yn rhedeg?
Caiff y rhaglen ei chyflwyno dros gyfnod o flwyddyn a derbynnir myfyrwyr ym mis Medi a mis Chwefror ym mhob blwyddyn academaidd. Yn ystod yr wythnosau academaidd, bydd angen i'r myfyrwyr ddilyn y rhaglen am un diwrnod bob wythnos. Rydym yn cynnig cyrsiau hybrid yn Llandrillo-yn-Rhos a Wrecsam yn ogystal â chwrs ar-lein lle mae'r dysgu i gyd yn digwydd o bell.

Beth allaf ei wneud ar ôl y cwrs?
Mae'r rhaglen hon yn caniatáu dilyniant i bob llwybr Nyrsio mewn Prifysgolion yng Nghymru a thu hwnt. Yn benodol, mae'r rhaglen yn cyfateb yn llawn i flwyddyn gyntaf y cwrs BN (Anrh.) mewn Nyrsio Oedolion ym Mhrifysgol Bangor a Phrifysgol Wrecsam. Golyga hyn y gall dysgwyr llwyddiannus symud ymlaen yn uniongyrchol i Lefel 5, sef ail flwyddyn rhaglenni Nyrsio er mwyn cwblhau'r rhaglen a dod yn nyrs gofrestredig. Yn ogystal, mae rhai cyflogwyr yn caniatáu dilyniant gyrfa, er enghraifft i swyddi sgiliau uwch band 4 Gweithwyr Gofal Cymorth Iechyd.

Sut byddaf yn cael fy asesu / pa aseiniadau sydd angen i mi eu gwneud ar y cwrs?
Defnyddir ystod o ddulliau asesu yn ystod y cwrs, yn amrywio o'r Ddogfen Asesu Ymarfer i arholiadau, traethodau, astudiaethau achos, cyflwyniadau a phoster academaidd.

A oes angen unrhyw beth arnaf i wneud y cwrs?
Mae gofynion mynediad ychwanegol ar gyfer y rhaglen hon. Cyn dechrau'r rhaglen, mae gofyn i'r myfyrwyr sicrhau bod ganddynt gefnogaeth Goruchwylydd Ymarfer ac Asesydd Ymarfer sydd wedi'i baratoi'n briodol drwy ymgymryd â chwrs a'r diweddariadau cysylltiedig. Rhaid i'r Aseswyr a'r Goruchwylwyr fod yn Nyrs Gofrestredig ar y rhan briodol o Gofrestr yr NMC i adlewyrchu arbenigedd y gofal sy'n cael ei ddarparu ym maes clinigol penodedig y lleoliad.

Dydw i ddim yn hyderus gyda TGCh neu gyfrifiaduron, ydy hynny'n broblem?
Na. Mae hyfforddiant sgiliau digidol yn rhan o'n holl raglenni dysgu.