Gradd Sylfaen (FdA) yn y Celfyddydau Coginio

Disgrifiad cwrs

Mae'r Radd Sylfaen hon yn gwella eich dealltwriaeth o'r celfyddydau coginio, yn rhoi gwybodaeth academaidd eang ichi ynghyd â'r sgiliau i roi'r wybodaeth honno ar waith yn y gweithle. Mae'r cwrs wedi'i ddyfeisio i ddatblygu eich galluoedd a'ch paratoi i weithio yn niwydiannau'r celfyddydau coginio.

Yn ystod y cwrs byddwch yn ennill dealltwriaeth gyffredinol o ddiwydiannau'r celfyddydau coginio, egwyddorion ymarfer coginio a'r ffordd y mae'r egwyddorion hynny wedi datblygu. Bydd gennych hefyd gyfle i astudio'n arbenigol i gyd-fynd â'ch amcanion personol chi fel unigolyn.

Yn ogystal â dod i wybod mwy am y diwydiannau coginio, byddwch yn datblygu sgiliau ymchwilio a datrys problemau ac yn dysgu sut i roi'r sgiliau hyn ar waith yn y gweithle. Wrth ichi ddatblygu, bydd y cwrs yn eich paratoi ar gyfer cyfrifoldebau'r rôl reoli yn y sector coginio.

Defnyddir siaradwyr gwadd yn gyson drwy gydol y rhaglen hon, ac mae eu mewnbwn yn cynnig cipolwg gwerthfawr ar agweddau ymarferol neu 'fyd go iawn' y celfyddydau coginio. Byddwch yn gallu elwa o arbenigedd y siaradwyr gwadd hyn a hefyd yn cael syniad o'r cyfleoedd sydd ar gael ichi yn y sector coginio.

Gwybodaeth uned

Ar gyfer pob 10 credyd, dylai'r myfyrwyr gwblhau tua 100 o oriau dysgu tybiannol. Bydd tua 30% o hyn yn gyswllt dysgu uniongyrchol, a 70% yn ddysgu annibynnol.

Bydd hyblygrwydd o ran y meysydd pwnc y bydd myfyrwyr am eu hastudio dros dair blynedd. Mae'r cwrs yn cynnwys y modiwlau canlynol:

BLWYDDYN 1 (Lefel 4)

Marchnata yn y Celfyddydau Coginio
Bwriad y modiwl hwn yw diffinio marchnata a hyrwyddo ac esbonio beth yw eu swyddogaeth yng nghyd-destun y celfyddydau coginio. Y nod yw rhoi sylw i'r seicoleg y tu ôl i sut mae defnyddwyr yn meddwl, yn teimlo, yn rhesymu ac yn dewis rhwng gwahanol frandiau, cynhyrchion a gwasanaethau.

Rhesymeg ymgyrch farchnata a nodiadau/delweddau ar gyfer arddangosfa (50%) / Arddangosfa ymgyrch farchnata a thrafodaeth (50%)

Proffil Proffesiynol a Datblygiad Personol
Bwriad y modiwl hwn yw galluogi dysgwyr i gyflawni aseiniadau amrywiol sy'n gysylltiedig â byd gwaith. Caiff y tasgau eu pennu ar y cyd gan gyflogwyr/cynrychiolwyr o'r diwydiant a staff y Grŵp, a'r bwriad yw rhoi sylfaen gadarn a dealltwriaeth i ddysgwyr ym maes cyflogadwyedd. Yn ogystal, mae'r modiwl yn canolbwyntio ar wella gallu dysgwyr i gyflwyno eu hunain yn effeithiol fel darpar weithwyr yn y diwydiant lletygarwch.

Portffolio unigol (100%)

Deall Gwasanaethau ym maes Bwyd a Diod
Bwriad y modiwl Gwasanaethau ym maes Bwyd a Diod yw rhoi dealltwriaeth gadarn i ddysgwyr o'r sector bwyd a diod yn y diwydiant lletygarwch. Yn y modiwl, edrychir ar wahanol agweddau'r elfen hon o'r diwydiant o safbwynt ymarferol. Trafodir nifer o themâu a fydd yn dangos sut mae'r diwydiant lletygarwch yn gyffredinol, a gwasanaethau bwyd a diod yn benodol, yn dylanwadu ac yn effeithio ar gymdeithas ac ar economïau lleol, cenedlaethol a rhyngwladol, ac ar y gweithwyr, y cwsmeriaid a'r cymdeithasau y maent yn darparu ar eu cyfer.

Traethawd (100%)

Ffotograffiaeth ym maes Bwyd a Diod
Bwriad y modiwl hwn yw datblygu gallu'r myfyrwyr i ddefnyddio arferion proffesiynol wrth dynnu lluniau bwydydd, gan wneud defnydd effeithiol o offer amrywiol fel camerâu digidol a ffonau clyfar.

Bydd yn galluogi'r myfyrwyr i ddefnyddio gwahanol dechnegau goleuo wrth dynnu lluniau bwydydd, gan ddefnyddio setiau a chefndiroedd gwahanol ac adfyfyrio ar y prosesau sy'n gysylltiedig â chreu ffotograffau effeithiol o fwydydd.

Yn ogystal, bydd myfyrwyr yn dod i ddysgu am gyfansoddiad ac arddull fel cysyniadau dylunio yng nghyswllt ffotograffiaeth bwyd a diod.

Portffolio (60%) / Cofnod Adfyfyriol (40%)

Diogelwch Bwyd
Mae bodloni gofynion arolygu a chydymffurfio â chyfraith bwyd yn hollbwysig yn y diwydiant bwyd. Felly mae'n hanfodol bod gan weithwyr y wybodaeth a'r hyder i ysgwyddo cyfrifoldeb ac i ddangos eu bod yn gymwys i reoli diogelwch bwyd. Yn unol â'r Safonau Galwedigaethol Cenedlaethol sy'n adlewyrchu gofynion penodol y sector, bydd y modiwl hwn yn darparu dealltwriaeth drylwyr o weithdrefnau diogelwch bwyd, gan bwysleisio pwysigrwydd dilyn gweithdrefnau HACCP.

Traethawd (60%) / Cynllun HACCP (40%)

Bwydydd Rhyngwladol
Wrth i'r pwyslais ar fwyd Prydeinig, Ffrengig ac Eidalaidd leihau, mae gofyn i gogyddion a rheolwyr ddeall rhagor am fwydydd rhyngwladol. Nod y modiwl hwn yw datblygu gwybodaeth y myfyrwyr am fwydydd rhyngwladol drwy edrych ar arferion coginio mewn rhannau gwahanol o'r byd. Wrth wneud hyn byddwn yn edrych ar seigiau traddodiadol, ac ar offer a nwyddau arbenigol. Darperir cyfleoedd i ail-greu amrywiaeth o brydau traddodiadol o ranbarthau coginio amrywiol. Wrth gynhyrchu'r bwyd, bydd gofynion deddfwriaethol yn cael eu rhoi ar waith tra bydd y seigiau'n cael eu defnyddio i ddatblygu meini prawf ar gyfer profi synhwyraidd.

Traethawd (50%) / Perfformiad (30%) / Dadansoddi trwy ddogfen ddyluniedig (20%)

Sgiliau Ymchwilio ac Astudio: Datgloi Llwyddiant Academaidd
Nod y modiwl hwn yw meithrin sgiliau astudio’r dysgwyr gan eu galluogi i feddwl yn feirniadol ac i gynhyrchu gwaith ysgrifenedig sy'n academaidd gadarn. Bydd yn galluogi'r myfyrwyr i feithrin sgiliau ymchwilio, ysgrifennu ac adfyfyrio.

Portffolio o Ymarferion a Thasgau (100%)

Rheoli Refeniw a Chostau
Bydd y modiwl hwn yn edrych ar bwysigrwydd dadansoddi refeniw, costau a chyllid ym maes celfyddydau coginio, gan bwysleisio'r defnydd ymarferol o ddulliau a thechnegau cyfrifyddu yn y diwydiant arlwyo a lletygarwch.

Portffolio o ymarferion (50%) / Arholiad llyfr agored (50%)

Gwin, Cwrw a'r Byd Coginio
Bydd y modiwl hwn yn edrych ar hanes cynhyrchu gwin a chwrw ac ar eu lle mewn cymdeithas, gan roi pwyslais neilltuol ar y byd coginio. Edrychir ar ba winoedd a bwydydd, yn ogystal ag ar ba gwrw a bwydydd, sy'n mynd gyda'i gilydd.

Poster a Chyflwyniad Hyrwyddo (50%) / Arholiad Llyfr Agored o Bell (50%)

Systemau Coginio Cynaliadwy
Bwriad y modiwl hwn yw rhoi dealltwriaeth gyffredinol i'r myfyrwyr o systemau coginio cynaliadwy ac arferion strwythuredig, technegau a thraddodiadau sy'n gysylltiedig â chynhyrchu, paratoi a bwyta bwyd mewn ffordd sy'n rhoi blaenoriaeth i reoli adnoddau naturiol ac ecosystemau yn gynaliadwy. Mae arferion yn cynnwys lleihau gwastraff bwyd (rheoli ac ymddygiad), bwydydd tymhorol a bwydlenni cynaliadwy, gan ddefnyddio cynhwysion lleol a chefnogi ffermwyr a chynhyrchwyr lleol.

Creu bwydlen (40%) / Cyflwyniad a thrafodaeth (60%)

BLWYDDYN 2 (Lefel 5)

Mae bwyd yn gwbl angenrheidiol i fywyd, ond eto'n cynnig mwy na chynhaliaeth neu faeth yn unig; mae pwy sy'n bwyta beth, sut mae'n cael ei fwyta a phwy sy'n bwyta gyda phwy yn helpu i lunio hunaniaeth ac etifeddiaeth goginiol. Yn y modiwl hwn, edrychir ar draddodiadau cyfnewidiol bwyd a'r hyn sy'n dylanwadu arnom wrth ddewis bwyd, yn cynnwys ffactorau diwylliannol a chymdeithasol a ffactorau'n ymwneud â chrefydd, gwleidyddiaeth ac alltudiaeth. Yn ogystal â hyn, bydd gwerth cydfodolaeth yn cael ei gloriannu wrth gydnabod y berthynas rhwng patrymau dietegol cyffredinol ac iechyd. Darperir cyfleoedd i ail-greu amrywiaeth o brydau traddodiadol o ddiwylliannau coginio amrywiol.

Traethawd (50%) / Perfformiad Ymarferol (20%) / Dadansoddiad Ysgrifenedig (30%)

Gastronomeg Gyfoes
Nod y modiwl hwn yw edrych ar nodweddion damcaniaethol gastronomeg, gan isrannu a gwerthuso pob categori. Bydd y modiwl hefyd yn gwerthuso theori blasu o safbwynt hanesyddol a chyfoes, gan gydnabod sut y gellir dylanwadu ar y canfyddiad o flas. Trafodir cogyddion adnabyddus sy'n gysylltiedig ar gastronomeg gyfoes ac ystyrir arddulliau coginio a sut maent yn cyfrannu at israniadau yn y maes. ⁠Bydd cyfleoedd i dreialu technegau modernaidd mewn lleoliad ymarferol gan roi pwyslais ar archwilio'r berthynas rhwng gastronomeg a gwyddoniaeth gymhwysol.

Traethawd (50%) / Perfformiad ymarferol (25%) / Dadansoddiad ysgrifenedig (25%)

Mentergarwch a Datblygu Busnesau Bach ym maes Coginio
Bwriad y modiwl hwn yw rhoi i'r myfyrwyr ddealltwriaeth bersonol a dealltwriaeth fusnes o'r prosesau, y dewisiadau a'r heriau creadigol y bydd entrepreneuriaid a rheolwyr yn eu hwynebu wrth lansio menter newydd neu ddatblygu busnes sydd eisoes wedi'i sefydlu. Bydd yn canolbwyntio ar sawl agwedd ar reoli busnes, ac yn cyflwyno meysydd pwnc sy'n dylanwadu ar y penderfyniadau tymor byr a thymor hir a wneir gan entrepreneuriaid a rheolwyr. Yn ogystal, bydd y modiwl yn edrych ar sut y caiff mentrau eu rheoli, gan roi sylw i weinyddiaeth busnesau, yn enwedig busnesau bach a chanolig.

Cynnig/cynllun busnes unigol (50%) / Cyflwyniad (50%)

Rheoli Adnoddau
Nod y modiwl Rheoli Adnoddau yw ymhelaethu ar yr hyn ar ddysgwyd o'r profiadau ymarferol a gafwyd mewn nifer o fodiwlau ar lefel 4. Bydd y modiwl yn rhoi i'r dysgwyr y wybodaeth a'r ddealltwriaeth sydd eu hangen arnynt i nodi a chydnabod sut mae adnoddau yn cael eu rheoli'n effeithiol ar draws amrywiaeth o fusnesau lletygarwch ac arlwyo.

Adroddiad (100%)

Bwyd, Maeth a Diet
Mae cysylltiadau rhwng bwyd ac iechyd yn faes clinigol sy'n cael sylw cynyddol gan y cyhoedd a'r llywodraeth. Nod y modiwl hwn yw cyflwyno'r myfyrwyr i'r egwyddorion sy'n allweddol i faetheg ddynol a darparu gwerthfawrogiad ehangach o'r rôl gymhleth sydd gan fwyd o ran hybu iechyd ac atal afiechydon. Wrth archwilio swyddogaeth micro a macrofaethynnau a'r cysyniad o ddiet cytbwys, bydd effeithiau seicolegol diffygion maethol a gwenwyndra'n cael eu cydnabod.

Adroddiad anffurfiol (100%)

Datblygu Cynnyrch Newydd
Nod y modiwl yw galluogi'r myfyrwyr i ddeall a defnyddio'r camau y mae gofyn eu dilyn er mwyn datblygu cynnyrch newydd yn y diwydiant bwyd.⁠ ⁠Trwy ymchwilio i'r farchnad bydd gyd gofyn i'r myfyrwyr gael syniad ar gyfer cynnyrch newydd. Yna, gan ddilyn y gwahanol gamau, mae'r cynnyrch yn cael ei wneud gan roi pwyslais ar y gofynion o ran diogelwch bwyd a rheoliadau cyfreithiol. Cyflwynir y cynnyrch gan adfyfyrio ar y prosesau a ddilynwyd.

Portffolio o Dystiolaeth (40%) / Cyflwyniad (40%) / Adfyfyrio (20%)

Technegau Ymchwil Strategol
Nod y modiwl hwn yw galluogi'r myfyrwyr i roi ystod o sgiliau ymchwilio a sgiliau ysgrifennu academaidd priodol ar waith i astudio lletygarwch a chelfyddydau coginio'n gyffredinol ac mewn cyd-destunau mwy penodol.

Bydd y myfyrwyr hefyd yn meithrin dealltwriaeth o ddulliau ymchwilio a moeseg ymchwilio ac yn dysgu sut i ystyried pwysigrwydd moeseg wrth ymchwilio. Yn ogystal, bydd y modiwl yn canolbwyntio ar lunio dadleuon sy'n argyhoeddi drwy ddefnyddio dulliau ymchwilio, dadansoddi a gwerthuso dilys.

⁠Cynnig Ymchwil (100%)

Cynllunio a Chynnig Profiadau
Nod y modiwl Cynllunio a Chynnig Profiadau Thematig yw rhoi cyfle i'r myfyrwyr ddangos ystod o sgiliau ymarferol a gwybodaeth ddamcaniaethol a fydd yn ymhelaethu ar yr hyn y maent eisoes wedi'i ddysgu. Bydd y modiwl yn rhoi i'r myfyrwyr y wybodaeth a'r sgiliau trefniadol fydd eu hangen arnynt i drefnu, cynnal a gwerthuso digwyddiad neu brofiad bwyd a diod thematig, gan roi ystyriaeth i'r holl elfennau amrywiol sy'n rhan o reoli digwyddiad o'r fath yn llwyddiannus.

Cynllunio, trefnu a chynnal digwyddiad/profiad ymarferol (70%) / Adfyfyrio a gwerthuso (30%)