Gradd Sylfaen (FdSc) Theori Cwnsela

Darperir y cwrs ar gampws Llandrillo-yn-Rhos mewn canolfan brifysgol arbenigol sy'n darparu cyfleusterau dysgu ac addysgu sydd wedi'u teilwra i fyfyrwyr gradd. Mae'r Ganolfan yn cynnwys darlithfeydd o'r radd flaenaf, ystafelloedd seminar, adnoddau llyfrgell arbenigol, cyfleusterau TG a mannau astudio.

Blwyddyn 1 - Modiwlau Lefel 4*

Datblygiad Proffesiynol
Bydd y modiwl hwn yn eich galluogi i ymestyn eich gwybodaeth a'ch sgiliau mewn perthynas ag ymarfer, gan feithrin eich gallu i adfyfyrio a gwella eich hyder a'ch sgiliau gwneud penderfyniadau. Byddwch yn cael eich annog i feithrin annibyniaeth a chyfrifoldeb personol yn eich rôl broffesiynol ac o ran eich datblygiad personol eich hun fel eich bod yn gallu gwneud cyfraniad cadarnhaol i fywydau unigolion, ac i'w dysgu, eu datblygiad a'u lles.

Sgiliau Cwnsela Sylfaenol
Nod y modiwl hwn yw datblygu eich gallu i gyfathrebu a'ch sgiliau rhyngbersonol. Cewch gyfleoedd i ddatblygu ystod o sgiliau cwnsela yn ogystal â sgiliau hunanymwybyddiaeth a hunanasesu. Cewch eich cyflwyno hefyd i ddulliau strwythuredig o ddysgu er mwyn datblygu eich sgiliau helpu .

Cwnsela Dyneiddiol
Bydd y modiwl hwn yn eich galluogi i ddeall prif elfennau'r theori ddyneiddiol a'i pherthnasedd i gwnsela. Bydd y modiwl rhoi dealltwriaeth ddamcaniaethol gadarn i chi o ddulliau sy'n canolbwyntio ar unigolion, o ran damcaniaeth datblygiad a phrosesau a sgiliau therapiwtig. Yn ogystal, byddwch yn cael eich arwain i drafod ac archwilio prif ragdybiaethau'r damcaniaethau. Bydd hyn yn sail ar gyfer archwilio profiadau eich cleientiaid a'ch profiadau eich hun.

Cwnsela Cynhwysol

Nod y modiwl hwn yw cynyddu eich dealltwriaeth o amrywiaeth a chynhwysiant yn y proffesiwn cwnsela. Bydd y modiwl yn ceisio creu amgylchedd dysgu sy'n croesawu cynhwysiant ac yn hyrwyddo mynediad cyfartal i gymorth i unigolion o amrywiol gefndiroedd. Bwriad yw modiwl yw rhoi i chi'r wybodaeth, y sgiliau a'r agweddau sydd eu hangen i ymgysylltu'r effeithiol â chleientiaid o boblogaethau amrywiol trwy ddod i ddeall deddfwriaethau a pholisïau, ac yna eu rhoi ar waith.

Cyflwyniad i Gwnsela
Bydd y modiwl hwn yn eich galluogi i ddeall beth yw cwnsela a beth yw rôl y therapydd wrth archwilio profiadau cleientiaid. Byddwch yn meithrin dealltwriaeth o'r broses therapiwtig o safbwynt y cleient a'r cwnselodd. Edrychir ar yr egwyddorion seicolegol sy'n sail i'r theorïau cwnsela allweddol.

Cyflwyniad i Sgiliau Ymchwilio ac Astudio
Nod y modiwl hwn yw meithrin eich sgiliau astudio, gan eich galluogi i gynhyrchu gwaith ysgrifenedig academaidd cadarn, a chyflwyno sgiliau meddwl yn feirniadol a sgiliau ymchwilio sylfaenol. Bydd yn eich galluogi i feithrin sgiliau ysgrifennu academaidd, i ddefnyddio confensiynau academaidd, i chwilio am wybodaeth, i adfyfyrio ac i reoli a rhoi trefn ar eich gwaith.

Arfer Proffesiynol a Moeseg
Yn y modiwl hwn byddwch yn gweithio eich ffordd trwy Fframwaith Moesegol BACP er mwyn meithrin gwybodaeth a dealltwriaeth o'r prif egwyddorion yn y proffesiwn cwnsela. Yn ogystal â chael dealltwriaeth gysyniadol o'r fframwaith moesegol, byddwch yn defnyddio'r wybodaeth yn eich modiwl ymarferol wrth ymarfer eich sgiliau cwnsela gyda myfyrwyr eraill cyn gweld cleientiaid.

*I’r rhai sydd wedi astudio ac wedi ennill cymhwyster Lefel 4 mewn Cwnsela, gallwn gydnabod eich holl ddysgu blaenorol ar Lefel 4 fel eich bod yn ymuno â’r rhaglen yn uniongyrchol ar Lefel 5.

Blwyddyn 2 - Modiwlau Lefel 5

Sgiliau Cwnsela Uwch
Bwriad y modiwl yw rhoi i chi sgiliau cwnsela uwch a gwella eich ymarfer i lefel uwch o hyfedredd therapiwtig. Trwy hyfforddiant uwch byddwch yn meithrin dealltwriaeth fwy trwyadl o ddulliau therapiwtig amrywiol, gan eich galluogi i deilwra ymyriadau i anghenion unigryw pob cleient.

Ymchwil a Dysgu Uwch
Bydd y modiwl yn eich galluogi i gymhwyso ystod o sgiliau ymchwil sy'n briodol i'r pwnc rydych yn ei astudio. Bydd gofyn i chi gael sgiliau o'r radd flaenaf o ran ysgrifennu academaidd a chwilio am wybodaeth, a'r gallu i roi amrywiaeth o ddulliau ymchwilio dilys ar waith. Bydd hefyd yn meithrin dealltwriaeth o foeseg ac yn dysgu sut i ystyried pwysigrwydd moeseg wrth ymchwilio. Yn ogystal, bydd y modiwl yn canolbwyntio ar lunio dadleuon sy'n dal dŵr drwy ddefnyddio dulliau ymchwilio, dadansoddi a gwerthuso dilys.

Ymlyniad ac Adfyd
Bwriad y modiwl yw rhoi ymwybyddiaeth i chi o ymlyniad ac adfyd sy'n gysyniadau arwyddocaol ym maes cwnsela, yn enwedig yng nghyd-destun deall lles emosiynol a seicolegol unigolion. Byddwch yn ystyried adfyd trwy helpu cleientiaid i archwilio effaith heriau presennol, neu heriau o'r gorffennol, ar eu lles, gan nodi strategaethau ymdopi a meithrin gwytnwch.

Iechyd Meddwl a Lles
Bydd y modiwl yn codi ymwybyddiaeth y myfyrwyr o ddigwyddiadau cyffredin bywyd a rhwystrau i les, ac yn gwella eu dealltwriaeth o rai o'r anhwylderau iechyd meddwl mwyaf cyffredin. Byddwch yn gallu adnabod nodweddion pwysicaf pryderon iechyd fel y diffinnir hwy yn Diagnostic and Statistical Manual of Mental Disorder, Fifth Edition (DSM-5; 2013 (cyfeirir hefyd at y ICD-10), ac ymateb yn briodol, diogel a moesegol. Cewch eich cyflwyno i'r asesiadau iechyd meddwl y gall cwnselwyr eu cynnal, a byddwch yn gwella eich ymyriadau a'ch sgiliau therapiwtig i gynorthwyo cleientiaid sy'n dioddef gofid seicolegol penodol yn ystod sesiynau cwnsela.

Grŵp Datblygiad Personol
Bydd y modiwl hwn yn eich annog i adfyfyrio'n fewnol er mwyn meithrin ymwybyddiaeth bersonol, hwyluso twf personol a'ch gallu i dderbyn eich hun trwy ryngweithio a chymryd rhan mewn prosesau sesiynau grŵp. Byddwch yn cysylltu syniadau a chysyniadau damcaniaethol â'ch datblygiad personol eu hun; yn mynd i'r afael ag unrhyw faterion datblygiadol a all effeithio ar eich gallu i weithio'n effeithiol gyda chleientiaid; yn meithrin a gwella eich gallu i hunan-adfyfyrio.

Cwnsela Seicodynamig
Bydd y modiwl hwn yn eich cyflwyno i theorïau ac arferion seicodynamig mewn cwnsela ac yn ystyried dulliau posibl o sefydlu sgiliau a thechnegau’n ddiogel a moesegol yn eich gwaith presennol gyda chleientiaid. Bydd y modiwl yn eich helpu i ddeall a datrys y gwrthdaro, y cymhellion ac emosiynau sylfaenol sy'n dylanwadu ar feddyliau, teimladau ac ymddygiad. Bydd hefyd yn cynnig dehongliadau o feddyliau, teimladau ac ymddygiad cleientiaid, gan eu helpu i gael gwell dealltwriaeth ac ymwybyddiaeth.

Gweithio ar Hyd Rhychwant Oes
Bwriad y modiwl hwn yw rhoi gwybodaeth sylfaenol i chi o wahanol ddamcaniaethau seicoleg ddatblygiadol sy'n ymwneud â datblygiad dynol ar hyd rhychwant oes, o blentyndod a glasoed i fyd oedolion. Rhoddir ystyriaeth hefyd i faterion cyfoes yn ymwneud â datblygiad dynol. Byddwch yn meithrin dealltwriaeth o'ch datblygiad eich hun ar hyd rhychwant oes, yn ogystal â chleientiaid sy'n cael eu cwnsela.