Technoleg Gwybodaeth Lefel 3

Oes gennych chi ddiddordeb mewn gyrfa ym maes Technoleg Gwybodaeth? A fyddech chi’n elwa o gwrs TG amrywiol a fyddai'n eich paratoi ar gyfer ystod eang o rolau TG? Mae'r rhaglen hon yn rhoi gwybodaeth a sgiliau i chi o nifer o feysydd sy'n greiddiol i Dechnoleg Gwybodaeth, a chyfle i ennill cymhwyster Lefel 3 cydnabyddedig. Mae Diploma Estynedig Lefel 3 yn cyfateb i 3 cymhwyster Safon Uwch.

Mae Technoleg Gwybodaeth yn rhoi cyfle i fyfyrwyr astudio pwnc sy'n agor drysau i lawer o wahanol ddiwydiannau.

Mae'r cwrs hwn yn ddelfrydol os nad ydych yn siŵr ym mha faes TG yr hoffech chi weithio, neu os ydych am ddysgu cymysgedd o sgiliau TG. Byddwch yn astudio amrywiaeth o feysydd arbenigol gan gynnwys dylunio a graffeg gwefannau, datblygu gemau cyfrifiadurol, datblygu apiau, rhaglennu a seiberddiogelwch.

Trwy gydol y cwrs, byddwch yn elwa o gyfleusterau rhagorol, gan gynnwys ystafelloedd amlgyfrwng a chaledwedd â chyfarpar da, yn ogystal â chyfleusterau TG pwrpasol i astudio yn eich amser eich hun.

Bydd cyfleoedd hefyd i ehangu’r hyn a ddysgwch drwy ymweliadau gan siaradwyr gwadd, gweithgareddau grŵp a theithiau. Mae myfyrwyr ar y cwrs TG hefyd yn cymryd rhan mewn prosiectau megis Code Club, ac wedi bod yn ymwneud â gwaith i Barc Cenedlaethol Eryri yn creu codau QR. Byddwch yn ennill profiad a gwybodaeth mewn defnydd ymarferol o dechnoleg gwybodaeth, yn enwedig systemau rheoli cronfa ddata, taenlenni, meddalwedd cyflwyno, cyfryngau cymdeithasol a datblygu gwefannau.

Mae’r cwrs wedi’i ddiweddaru’n ddiweddar ac wedi’i ddatblygu i alluogi myfyrwyr i feithrin y sgiliau technegol a’r wybodaeth sydd eu hangen i weithio yn y diwydiant cyfrifiaduron. Pe dymunai'r myfyriwr gallai symud ymlaen i gyrsiau gradd addysg uwch mewn technoleg gwybodaeth a meysydd cysylltiedig, megis datrysiadau technoleg ddigidol, TG rheolaeth ar gyfer busnes, rhwydweithiau cyfrifiadurol a diogelwch neu gyfrifiadura creadigol.