Darlithydd Trydanol/Ynni Adnewyddadwy/Peirianneg Pwer

Mae'r Ganolfan Isadeiledd, Sgiliau a Thechnoleg (CIST) yn ganolfan hyfforddi masnachol arloesol wedi’i lleoli yn Llangefni, sy’n cynnig portffolio unigryw a chynyddol o gyrsiau mewn seilwaith, ôl-osod, ynni adnewyddadwy, a hyfforddiant llinellau trydan uwchben. Fel arweinydd mewn hyfforddiant i'r sectorau adeiladu ac ynni, mae CIST wedi ymrwymo i roi'r sgiliau a'r wybodaeth sydd eu hangen ar ddysgwyr i ffynnu mewn diwydiannau sy'n datblygu'n gyflym tuag at gynaliadwyedd ac effeithlonrwydd ynni.

Byddwch yn rhan o dîm arloesol a dyfodol cyffrous yn CIST. Mae ein cyfleusterau blaengar yn cynnwys Canolfan Hyfforddi ynghylch Datgarboneiddio - Tŷ Gwyrddfai - gyda chynlluniau i ehangu i gyfleusterau newydd sbon o’r radd flaenaf yn Llanelwy. Mae campws Llangefni a Thŷ Gwyrddfai yn cynnig amgylchedd dysgu deinamig a chynhwysol, sy'n cynnwys:

· Prif ganolfan hyfforddi fodern gyda phedair ystafell hyfforddi helaeth, cyfleusterau lles, pedair ystafell cynnal profion, ac ystafell benodol yn cynnwys yr adnoddau Technoleg Gwybodaeth i gynnal profion y Cynllun Ardystio Sgiliau Adeiladu (CSCS)

· Canolfan hyfforddi arbenigol yn maes sgaffaldiau, a chynigir hyfforddiant fforch godi, codi a chario deunyddiau a hyfforddiant ynghylch ynni adnewyddadwy, gyda thair ystafell hyfforddi ychwanegol

· Canolfan Hyfforddi ac Asesu Nwy ACS

· Canolfan Hyfforddi ym maes Technoleg Ddi-Garbon sy'n canolbwyntio ar systemau ynni adnewyddadwy blaengar, technegau adeiladu cynaliadwy, ac ôl-osod i sicrhau
effeithlonrwydd ynni

· Ardaloedd awyr agored helaeth ar gyfer hyfforddiant Gweithredu Peiriannau, Canfod Tanddaearol, Gweithio ar Uchder, a gweithio ar linellau trydan uwchben gan roi profiad ymarferol gydag offer go iawn

Rydym yn chwilio am unigolyn brwdfrydig, blaengar, i ymuno â'n tîm arbenigol. Yn y swydd hon, byddwch yn cael y cyfle i gyflwyno hyfforddiant o'r safon uchaf, gan rymuso dysgwyr i ragori mewn meysydd galw uchel fel ôl-osod, ynni adnewyddadwy, peirianneg pŵer, a gweithio ar linellau trydan uwchben. Byddwch yn allweddol wrth siapio gweithlu’r dyfodol, gan gefnogi dysgwyr wrth iddynt ennill y sgiliau ymarferol a damcaniaethol sydd eu hangen i lwyddo yn y sectorau hollbwysig hyn, yn enwedig wrth i’r Deyrnas Unedig weithio tuag at ei thargedau datgarboneiddio.

Os ydych chi'n angerddol am addysg, cynaliadwyedd ac arloesi, ac eisiau bod yn rhan o ganolfan ragoriaeth a gydnabyddir yn genedlaethol, rydym yn eich annog i wneud cais. Gyda'n gilydd, byddwn yn sbarduno cynnydd ac yn cynorthwyo i lunio'r genhedlaeth nesaf o weithwyr proffesiynol medrus.

Pwrpas y Swydd:

Pwrpas swydd Darlithydd mewn Peirianneg Drydanol, Ynni Adnewyddadwy, a Phŵer yn y Ganolfan Isadeiledd, Sgiliau a Thechnoleg (CIST) yw cyflwyno hyfforddiant damcaniaethol ac ymarferol o ansawdd uchel yn unol â safonau cyfredol y diwydiant, gan gynnwys rheoliadau Trydanol a'r Cynllun Ardystio Microgynhyrchu (MCS). Bydd yr ymgeisydd llwyddiannus yn trefnu ac yn cynnal sesiynau yn yr ystafell ddosbarth yn ymdrin â phynciau allweddol megis gosodiadau trydanol, technolegau ynni adnewyddadwy, egwyddorion peirianneg pŵer, a meysydd hyfforddi arbenigol megis Gweithio ar linellau trydan uwchben ac Uniadau Foltedd Isel.

Yn ogystal â chyflwyno'r theori yn yr ystafell ddosbarth, bydd y darlithydd yn arwain hyfforddiant ymarferol mewn amgylchedd gweithdy ac yn yr awyr agored, gan gynnwys ardaloedd efelychu'r byd go iawn ar gyfer gweithio ar linellau trydan uwchben, cynhyrchu pŵer, a gosod systemau ynni adnewyddadwy. Bydd y dull cynhwysfawr hwn yn rhoi’r sgiliau sydd eu hangen ar ddysgwyr i fodloni gofynion cynyddol y sectorau seilwaith ac ynni.

Mae'r swydd hefyd yn cynnwys asesu gwaith dysgwyr, yn yr ystafell ddosbarth a thrwy asesiadau ar y safle yn y gweithleoedd, gan sicrhau bod myfyrwyr yn dangos cymhwysedd wrth ddefnyddio cymwysiadau'r byd go iawn. Mae cydweithio'n agos â Sefydliadau Dyfarnu yn hanfodol i gynnal ansawdd uchel deilliannau dysgwyr, gan sicrhau bod pob asesiad yn bodloni safonau'r diwydiant.

A bydd y darlithydd yn ymwybodol o'r datblygiadau diweddaraf mewn peirianneg drydanol, ynni adnewyddadwy, a pheirianneg pŵer, gan ymgorffori datblygiadau newydd yn eu haddysgu i sicrhau bod dysgwyr yn barod ar gyfer yr heriau a'r cyfleoedd esblygol yn y sector, yn enwedig mewn arferion cynaliadwy ac ynni effeithlon.