Gwella eich dyfodol drwy weithio i ni

Mae ein graddfeydd cyflog yn cymharu’n ffafriol â’r hyn a gynigir gan gyflogwyr eraill yng Ngogledd Cymru. Gall y staff addysgu dderbyn hyd at £47,000 y flwyddyn, gyda swyddi rheoli a chefnogi yn talu hyd at £66,000 y flwyddyn.

Yn ogystal â chael cyflog cystadleuol, cewch ymuno ag un ai’r Cynllun Pensiwn Athrawon neu’r Cynllun Pensiwn Llywodraeth Leol. Mae’r ddau gynllun yn cynnig buddion na cheir eu tebyg yn y sector preifat gan eich helpu i wireddu eich breuddwydion tymor hir.

Caiff darlithwyr 46 diwrnod o wyliau’r flwyddyn, gyda rheolwyr a staff cefnogi busnes yn cael rhwng 28 a 37 diwrnod. Beth bynnag fo’ch swydd, rydym yn rhoi hyd at 5 diwrnod o wyliau ychwanegol i bawb dros y Nadolig. Rydych yn gweithio’n galed, felly’n mae’n bwysig eich bod yn treulio amser gyda’r teulu ac yn cael cyfle i gael eich gwynt atoch.

Rydym yn awyddus i gefnogi staff i gael cydbwysedd rhwng bywyd a gwaith, ac mae contractau cenedlaethol amrywiol wedi’u cytuno â’r undebau er mwyn sicrhau hyn. Mae’r oriau a’r dyddiau gwaith yn cael eu cytuno er mwyn bodloni anghenion yr unigolyn a’r sefydliad.

Drwy gynnig gyrfa i chi mae’r Grŵp yn ymroi i ddarparu datblygiad proffesiynol parhaus a chyfleoedd i gael hyfforddiant arbenigol, un ai yn y Grŵp neu gan bartneriaid ledled y wlad.

Mae gan y Grŵp gyfleusterau diguro. Cewch ddefnyddio’r rhain i gyd, o’r bwytai sydd wedi ennill gwobrau lu i’r campfeydd, y llyfrgelloedd a’r salonau gwallt a harddwch. Cewch hefyd ddefnyddio cyfleusterau sefydliadau eraill.

Rhaid i’r Grŵp chwarae ei ran yn yr ymdrech i fynd i’r afael â newid hinsawdd. Rydym yn aelod o’r ‘cynllun beicio i’r gwaith’ ac mae gennym hefyd gynllun mewnol i rannu ceir.

Mae’r dechnoleg ddiguro a’r gefnogaeth a geir gan arbenigwyr brwd yr adran TGCh yn galluogi staff i weithio’n hyblyg ar holl safleoedd y Grŵp ac o adref.

Mae pawb angen cymorth o bryd i’w gilydd. Os bydd angen gallwch gael cyngor a chefnogaeth gan wasanaeth iechyd galwedigaethol proffesiynol, ac mae hyn yn cynnwys gwasanaeth cwnsela. Mae eich iechyd corfforol a meddyliol yn hanfodol i lwyddiant y Grŵp, felly rydym yn darparu adolygiadau rheolaidd i sicrhau bod eich gwaith a’ch amgylchedd yn eich cefnogi i gyflawni eich potensial.

Mae ein partneriaeth â Vectis yn eich galluogi i hawlio gostyngiadau mewn cannoedd o siopau ledled y wlad. Drwy aberthu cyflog, gallwch fanteisio ar gynlluniau sy’n cynnig talebau gofal plant. Trwy’r Grŵp gallwch hefyd fanteisio ar gynllun buddion ceir sy’n ffordd glyfar o redeg car. Caiff cyfanswm penodol ei gymryd yn uniongyrchol o’ch cyflog gros bob mis sy’n golygu eich bod yn gwneud arbedion ac yn cael car newydd sbon.

O fyw yng Ngogledd Cymru gallwch fanteisio ar brisiau tai cystadleuol a mwynhau cyfoeth naturiol y mynyddoedd, y llynnoedd a’r môr.

Y Grŵp yw darparwr mwyaf cyrsiau hyfforddi cyfrwng Cymraeg yng Nghymru. Beth bynnag fo’ch sgiliau, mae’r Coleg wedi ymrwymo i’ch helpu i’w datblygu ymhellach drwy ddefnyddio tiwtoriaid, cyrsiau a chyfleusterau ar-lein. Ac wrth gwrs, mae’r amgylchiadau a geir yma’n ddelfrydol ar gyfer ymarfer yr iaith.

Mae gan y Coleg berthynas ragorol â’r undebau sydd wedi cael cydnabyddiaeth ffurfiol i gefnogi darlithwyr, rheolwyr a staff cefnogi busnes. Ar sail eich gyrfa, anogir chi felly i ystyried ymaelodi ag un ai UCU, UCAC, UNSAIN, UNITE neu NEU.