Tystebau

Chefais i mo'r cymorth yr oeddwn ei angen i lwyddo mewn Mathemateg yn yr ysgol gan fy mod yn cael trafferth yn y pwnc oherwydd bod dyscalcwlia a dyslecsia arnaf. Mae fy hyder wedi gwella'n fawr, a dw i'n sylwi bod fy mathemateg wedi gwella yn gyffredinol.

Mae'r tiwtoriaid a'r staff yn awyddus i chi lwyddo ac felly'n eich annog i wneud eich gorau. Mae fel cael sgwad o gefnogwyr personol ar gyfer eich mathemateg!

Yr hyn sy'n allweddol i allbwn gwnïo rhagorol yw bod yn fanwl gywir gyda'ch meintiau, felly mae dealltwriaeth dda o rifau yn hollbwysig.

Dw i wedi mwynhau'r cwrs yn fawr; roedd y tiwtor yn ardderchog ac mi wnes i fwynhau'r cyfeillgarwch o ddysgu gydag eraill fel grŵp. Mae’n bosibl y bydd y peiriant gwnïo a brynodd fy ngŵr i mi flynyddoedd yn ôl yn cael ei ddefnyddio o’r diwedd, diolch i’r sgiliau gwnïo a rhifedd dw i wedi’u datblygu ar y cwrs yma.

Rwy'n wirioneddol angerddol am yr hyn y gallwn ei wneud i ddatblygu ein cydweithwyr i roi'r cyfle gorau iddynt lwyddo yn eu gyrfaoedd.

Dyma pam mae Lluosi yn gweithio'n dda i ni gan fod cymhwyster TGAU mathemateg yn rhoi rhywbeth iddynt gadw wrth gefn na fyddent wedi cael y cyfle i’w ennill o'r blaen. Rydym mor falch ein bod wedi bachu ar y cyfle hwn gyda dwy law, mae ein cydweithwyr wrth eu boddau.

Yn y byd academaidd dw i'n meddwl bod 'na argraff bod angen i chi fod yn dda mewn mathemateg i fod yn dda mewn mathemateg. Ond rydyn ni i gyd yn gwneud mathemateg bob dydd heb sylwi. A dydych chi ddim angen hynny wedi'i wthio i'ch wyneb.

Mae'r holl sgiliau yn drosglwyddadwy, p'un a ydych chi'n mynd ymlaen i weldio pellach, neu'n ennill rhywbeth o ddod i gwrdd â gwahanol bobl a dysgu sut i gyfathrebu mewn amgylchedd gwahanol. Dw i’n meddwl ei fod o i gyd yn fuddiol. Felly dewch i roi cynnig arni. Mae o am ddim, felly pam lai!

Ro'n i'n gweld safon y tiwtora'n wych. Roedden nhw'n cynnig anogaeth i rywun sy'n araf yn cael gafael ar dechnoleg ac yn dangos digon o amynedd. Roedden nhw hefyd yn fy annog i gysylltu â nhw unrhyw bryd ar ôl y cwrs os ydw i'n cael trafferth cofio rhai o'r pynciau ddysgon ni.

Mi fyddwn yn annog unrhyw un i fynd ar y cwrs hwn oherwydd nid yn unig y mae wedi bod o fudd i mi, ond roedd y tiwtor yn gwneud i mi deimlo'n hyderus yn yr hyn ro'n i'n ei wneud, a wnes i ddim teimlo fel myfyriwr oedd ddim yn gwybod unrhyw beth o gwbl.

Roedd yn brofiad newydd i rai pobl, ac roedd yn golygu ein bod ni’n gyfan gwbl yn nwylo’r tiwtor. Roedd o'n agored iawn ac yn gwneud i bawb deimlo'n gyfforddus. Roedd ei allu fo i amseru popeth yn dda yn ei wneud o'n arbennig. Roedd ganddo fo amser i gwestiynau.

Doedd o ddim yn dweud, “Bydd yn rhaid i chi aros am ateb i hwnna.” Roedd pawb wedi mwynhau a chael llawer allan o'r sesiwn, ac roedd y tiwtor yn wych. Roedd o'n hwyliog ac yn hynod gymwynasgar. Roedd yn sensitif i anghenion unigolion, roedd yn gyflym iawn i weld pan oedd angen ychydig o gymorth neu gyngor ychwanegol ar rywun.

Roedd angen help arna i i drefnu cyrsiau coginio i gleientiaid. Mae hi'n anodd i bobl ac mae'r banc bwyd yn gwbl hanfodol. Nid dysgu sgiliau rhifedd yn unig sy'n digwydd yma, rydych chi'n dysgu sut mae siarad ag eraill.

Os bydd gofyn i chi weithio mewn grŵp, rydych yn dysgu sut mae siarad mewn grŵp. Roedd y tiwtor yn wych ac yn barod iawn i helpu. Roedd yn hawddgar iawn ac yn amyneddgar iawn gyda'r rhai oedd angen rhagor o gymorth.

Mae amrywiaeth o gyrsiau Lluosi ar gael y gellir eu haddasu ar eich cyfer. Mi wnes i grybwyll cynnwys cyrsiau wythnosol a misol ar gyllidebu ac ychwanegu pethau atynt, ac mae'r tiwtor wedi bod yn barod iawn i'n cynorthwyo.

Dyma un o'r pethau mwyaf defnyddiol i ni eu gwneud, defnyddio sylfaen y cwrs ac addasu hwnnw gan ychwanegu ato i gynnwys y pethau rydych angen eu dysgu.

Roedden ni eisiau canolbwyntio ar rywbeth yn yr awyr agored a oedd o fudd i'r gymuned ehangach felly roedd glanhau traeth i’w weld yn syniad da. Roedd y sesiwn yn ddifyr a rhyngweithiol iawn - y cymysgedd perffaith o theori mathemateg a gweithgareddau hwyliog.

Mae gweithio gyda Lluosi wedi bod yn ffordd ardderchog o ddod â gwirfoddolwyr ynghyd i annog creadigrwydd a gwella sgiliau rhifedd. Byddwn yn ei argymell i unrhyw sefydliad sydd am wella sgiliau rhifedd y bobl y maent yn gweithio gyda nhw wrth gael hwyl yr un pryd.

Mae’r cyrsiau hyn o fudd mawr i’n dysgwyr fel artistiaid ac fel ysgrifenwyr geiriau caneuon. Mae'n dysgu gwahanol dechnegau a gwahanol ffyrdd o strwythuro'r geiriau iddyn nhw, ond hefyd y fathemateg ddaw allan o hynny. Dwi'n meddwl fod unrhyw beth sy'n asio'r celfyddydau a'r gwyddorau efo’i gilydd yn wirioneddol flaengar ac effeithiol, oherwydd mae'n bosib gwahanu'r ddau beth - un yn defnyddio ochr chwith yr ymennydd a'r llall yr ochr dde.

Mae’n bosibl deall cerddoriaeth fel llif, neu fel teimlad, ond gallwch chi hefyd ei ddeall fel strwythur mathemategol. Felly rydyn ni'n rhoi'r ddau at ei gilydd.

Meddyliais i ddechrau sut y gallem gael y trigolion i ddefnyddio rhifau o ddydd i ddydd heb iddyn nhw sylweddoli hynny. Mae'r gweithgareddau yma wedi eu gwneud yn ymwybodol o faint y maen nhw yn ei ddefnyddio bob dydd; boed hynny'n gwneud croesair neu'n edrych dros y rhifau wrth baratoi bwyd gyda'r nos.

Mae wedi bod yn wych gweld pawb yn siarad ac yn trafod â phawb o'u cwmpas. O'm rhan i, mae'n wych pan fydd prosiectau fel Lluosi yn cyflwyno'r syniadau newydd 'ma. Mae wedi bod yn ffantastig, a gobeithio y byddant yn ei fwynhau fwyfwy.

Un o fanteision y cynllun Lluosi yw ein bod ni'n gallu trefnu gweithdai un-i-un neu weithdai grwpiau bach i'n buddiolwyr fynd ymlaen i ennill sgiliau newydd, ac magu hyder. Mae'n rhywbeth maen nhw'n gallu ei weld ochr yn ochr â thystysgrif. Ond maen nhw hefyd wedi gallu gwneud rhywbeth yn y gweithdy neu'r cwrs.

Felly mae'n gyfle gwych iddyn nhw gysylltu hefyd â'r coleg, gan wneud yn siŵr bod ganddyn nhw'r holl sgiliau sydd eu hangen arnyn nhw i fynd a chyrraedd eu nod o gael swydd.

Mae wedi mynd i lawr yn dda, pan ddywedon ni wrthyn nhw gyntaf ein bod yn ymgorffori mathemateg ynddo, roedd ymateb pawb yn "Ych... na, byth!" Ond maen nhw i gyd wedi gwneud yn dda iawn. Mae'r fathemateg yn sylfaenol ac yn defnyddio llinynnau a chrefftau, ac maen nhw i gyd wedi mwynhau'n fawr ac yn dod yn ôl am fwy o hyd. Fedran nhw ddim cael digon!

Tra bo'r bobl yma yn datblygu eu hochr greadigol, maen nhw hefyd yn defnyddio mathemateg, ac mae'n dda i'w lles a'u hiechyd meddwl. Gobeithio y bydd yn eu hannog i wneud mwy. Dyna'r prif beth, dal i fynd ar ôl i'r cwrs ddod i ben.

Mae dilyn y cwrs hwn wedi bod yn werth chweil i mi. Roedd yn cynnig amgylchedd cefnogol oedd wedi’i deilwra a oedd yn caniatáu i mi ganolbwyntio ar feysydd lle’r oeddwn angen gwella.

Roedd strwythur y cwrs yn teimlo’n llawer mwy personol ac effeithlon o gymharu â lleoliad ystafell ddosbarth traddodiadol, gan fy helpu i ddeall cysyniadau ar fy nghyflymder fy hun. Ar ôl cael fy nghymhwyster newydd, rydw i'n edrych ymlaen at astudio ymhellach a rhannu fy mrwdfrydedd am fathemateg gydag eraill.

Dydw i ddim wastad wedi bod yn gyfforddus gyda mathemateg. Mae fy mhrofiadau yn y gwaith wedi bod o gymorth ond roedd tiwtoriaid y cyrsiau hyn yn deall ein gallu ac yn barod iawn i'n cynorthwyol. Maen nhw'n diwtoriaid ardderchog sydd yn gofalu amdanom ar y cyrsiau.

Lluosi ydy'r lle i ddod oherwydd maen nhw'n deall nad ydy mathemateg yn hawdd i bawb, ac mae'n dda i mi oherwydd gall fod o gymorth i'ch plant hefyd. Wel, wyrion yn fy achos i!

Rydyn ni'n cefnogi ystod eang o ddysgwyr yma yn Co-Options ac mae gallu pawb o ran rhifedd yn wahanol. Fodd bynnag, mae Lluosi yn gallu addasu sesiynau ar gyfer pob dysgwr ac rydyn ni wedi gweld cynnydd mawr mewn hyder a gallu ymhlith yr holl ddysgwyr. Un o'r pethau pwysicaf yw bod pob sesiwn Lluosi wedi bod yn hwyliog a difyr.

Mae’r ffaith y gall y dysgwyr ychwanegu cyrsiau Lluosi at eu CV a mynd â thystysgrifau i gyfweliadau swyddi yn wych ac mae wir yn rhoi hwb i’w rhagolygon yn y byd gwaith.

Er fy mod yn dal i ymarfer fy mathemateg, mae gen i bellach fwy o ddealltwriaeth o'r dulliau sy'n cael eu defnyddio a'r pwrpas. Dw i'n defnyddio hyn mewn bywyd bob dydd, yn enwedig ar leoliad gwaith yn ystod y gwersi mathemateg.

Mi fyddwn i'n dweud mai'r cwrs hwn ydi'r ffordd orau o ddatblygu sgiliau oherwydd mae'n gyfle i ddysgu gyda'r hyblygrwydd a'r gwersi un-i-un cyfeillgar. Mae'r cwrs yn cynnig cefnogaeth i unrhyw un, waeth beth fo'u hoedran ac mae'n rhad ac am ddim.

Rydym yn chwilio am gyfleoedd ar gyfer ein grŵp o hyd, a gan fod hwn am ddim, roedd yn addas i bawb, ac roedd yn cynnig cyfle i gael blas arno a gweld beth gallwn ni gynnig yn y dyfodol. Mae eu hyder yn eu sgiliau rhifedd wedi datblygu hefyd.

Mae oedolion ag anghenion cymhleth yn ein grŵp, a nifer fydd yn dweud "Na, alla i ddim gwneud hyn". Ond drwy ei gyflwyno fel gêm, maen nhw'n sylweddoli eu bod yn gallu gwneud hyn.

Cysylltodd Lluosi â ni ac egluro beth y gallent ei gynnig ac roedd yn swnio'n ddiddorol. Roeddent yn barod i addasu adnoddau yn ôl yr angen er mwyn darparu ar gyfer y cymorth ychwanegol y byddai ein haelodau ei angen.

Roedd y tiwtor yn ddifyr ac yn barod i addasu wrth i'r sesiwn fynd yn ei blaen. Roedd y gemau mathemateg yn hwyl. I rai dyma oedd eu tro cyntaf yn chwarae’r math yma o gemau, ac fe wnaethon nhw eu mwynhau’n fawr.

Mae'n braf cael y dosbarthiadau yma hefo dim ond fi, fy chwaer a'r tiwtor. Mae fy chwaer yn eithaf swil. Fasa hi byth yn rhoi ei llaw i fyny mewn ystafell ddosbarth fawr i ofyn am help. Fe fyddwn i, ond os nad ydych chi'n hyderus dydych chi ddim eisiau gweiddi'r ateb na gofyn am help rhag ofn i chi wneud camgymeriad. Mae'n haws o lawer mewn sefyllfa 1:1 i ni.

Does gen i ddim ofn dod i'r gwersi yma o gwbl. Mae'n bleserus, a dw i'n deall mwy nag y gwnes i erioed o'r blaen.

Rydyn ni'n cyflawni pethau gwych, nid yn unig gyda'r hyn rydym yn ei gyflwyno ein hunain, ond gyda'n sefydliadau partner, ac mae Lluosi yn un enfawr sydd wedi ein cefnogi ar hyd y ffordd.

Mae'n gyffrous oherwydd mae'r cyrsiau yma yn rhoi rhywbeth arall, ar wahân i fod yn rhiant, i'r grŵp ganolbwyntio arno. Rydyn ni, ein teuluoedd ni a Lluosi i gyd wrth ein boddau efo'r Rhyl. Dw i'n edrych ymlaen at weld beth all y dyfodol ei gynnig a pha fath o gyfleoedd y gallwn eu cynnig o'r fan hon.

Un o'r prif bethau am lanhau traethau yw y gallwch chi ddod â rhifedd i mewn iddo mor hawdd. Os gallwn gael data i ategu hynny, yn enwedig niferoedd mawr, mae wedyn yn tueddu i gyfleu’r neges yn llawer gwell na dim ond dweud, “O, mae yna sbwriel.”

Dw i'n meddwl weithiau ein bod yn canolbwyntio cymaint ar addysg yn yr ysgol rydym yn anghofio am y boblogaeth ehangach, ac mae unrhyw beth sy'n gwneud rhifedd yn fwy perthnasol iddyn nhw i'w ganmol.

Mi wnes i ddechrau gwneud TGAU Rhifedd er mwyn fy helpu i wella fy sgiliau mathemateg a'u cael i lefel a fydd yn fy ngalluogi i helpu fy mab pan fydd yn cyrraedd y cam hwnnw yn yr ysgol. Ers dechrau fy sesiynau efo'r tiwtor, nid fy mathemateg yn unig sydd wedi gwella, dw i wedi gweld cynnydd enfawr yn fy hyder hefyd.

Dw i'n gwerthfawrogi'r holl help a'r addysg gefais i, ac mi fyddwn yn bendant yn annog eraill i gymryd y cam cyntaf 'na, mae'n gwneud gwahaniaeth!

Yn ystod y cwrs, dwi wedi datblygu'r sgil o weldio yn ogystal â defnyddio rhifau, a gweld fy mod yn ei fwynhau, a bod gen i sgil newydd dwi'n dda am ei gwneud. Roedd y tiwtor yn garedig iawn ac yn dda am egluro beth i'w wneud. Roeddwn yn gallu bod yn greadigol ac ymarfer gwahanol dechnegau weldio.

Dw i'n bendant yn meddwl y dylai mwy o bobl fod yn ymwybodol o'r cyrsiau Lluosi a chymryd mantais ohonyn nhw. Wyddoch chi byth, efallai y bydd yn rhywbeth y byddwch chi'n ei fwynhau trwy ddefnyddio rhifedd.

Ro'n i’n meddwl bod y gwersi un-i-un yn ddefnyddiol iawn ar gyfer dysgu pethau’n weddol gyflym a chael wedi ei deilwra i mi a oedd yn gadael i mi gael gafael iawn arno. Dwi'n eithaf hapus hefo fy ngradd, dwi'n meddwl bod Lluosi wedi rhoi’r help yr oedd ei angen arna‘ i i gael y canlyniad hwn.

Dwi wedi bod ar lawer o wahanol fathau o gyrsiau yn ystod y cyfnod hwn yn fy mywyd ac mi wnes i ddarganfod bod llawer ohonyn nhw ddim yn gweithio cystal i mi, ond roedd Lluosi yn gallu cadw fy niddordeb tan y diwedd.

Roedd y tiwtor yn berson trefnus dros ben oedd yn cynllunio'i wersi yn ofalus, ac, yn bwysig iawn, roedd ganddo'r ddawn o fedru egluro popeth mewn ffordd ddiddorol a dealladwy gan lwyddo i argyhoeddi hyd yn oed rhywun fel fi, oedd wedi cael profiad mor wael o'r pwnc o'r blaen, bod maths yn ddifyr - a heb fod yn anodd!

Mi wnes i fwynhau'r gwersi'n arw a deall popeth wnaeth o egluro i mi!

Hefo gwneud gwaith coed mae ‘na dipyn o màths yn dod i mewn i’r peth. Ma’ ‘na diwtor da iawn yma. Os oes ‘na rhywun isio help efo rhyw fàths ac ati, i weithio pethau allan, mae o wedi bod yna’n helpu.

Mae o wedi bod werth o, a faswn i’n annog rhywun sydd hefo diddordeb mewn gwaith coed ac isio dod, i ddod ar unwaith. Mae o ‘di bod yn gwrs da iawn. Dwi wedi’ fwynhau o a dwi wedi cael gwerth allan ohono fo a wedi dysgu sgiliau newydd, a gobeithio fedra’ i fynd a’r sgiliau yna adre’ hefo fi.

Mae dosbarthiadau fel y rhain yn gallu bod yn bwysig iawn i rieni gan fod pethau wedi newid ers pan oeddem ni yn yr ysgol; erbyn heddiw mae yno sawl ffordd wahanol o adio a lluosi. Mae'n bwysig i rieni ddeall eu gwaith cartref er mwyn iddynt allu helpu'r plant.

Mae'r tiwtor wedi gwneud crefftau o'r blaen, mae hi mor gyfeillgar, yn ddi-lol ac nid yw'n gwneud i’r gwaith edrych yn frawychus. Mae pobl leol yn ein hadnabod ni yma ac yn gwybod y gallent ddod yma am unrhyw beth. Mae pobl yn gwybod y gallent ddod i mewn a dysgu.

Roeddem yn meddwl y byddai noson o gemau gwyddbwyll yn gweddu i ofod cymunedol fel ein un ni yn eithaf da, ac roedd yr elfennau o rifedd yn fantais fawr i'r gweithgareddau.

Mantais fawr gweithio gyda Lluosi oedd eu ffocws ar addysgu grŵp bach. Mae'r tiwtor yn gallu ailadrodd rhywbeth neu ganiatáu i'r rhai sydd yno ofyn am help am rywbeth penodol. Roedd y cwrs Excel yn fuddiol iawn gan fod y rhai oedd yn bresennol yn dibynnu arno o ddydd i ddydd yn eu gweithle.

Roedd y sesiynau tiwtorial yn amhrisiadwy gan eu bod yn cynnwys cwblhau cyfres o gyn-bapurau a oedd yn dangos yn glir pa feysydd oedd ychydig yn anodd i mi.

Hoffwn fynegi fy ngwerthfawrogiad i fy nhiwtor, yn rhannol am sylweddoli mai cwblhau ffug-arholiadau oedd y ffordd orau i mi allu symud ymlaen ond hefyd am esbonio mewn termau dealladwy y meysydd hynny a oedd yn peri dryswch i mi.