Darlithwyr yn rhannu profiadau mewn cynhadledd beirianneg bwysig

Yn ddiweddar, rhannodd darlithwyr peirianneg Coleg Menai eu profiadau ym maes datblygu sgiliau technolegol blaengar mewn cynhadledd genedlaethol fawr.

Trefnwyd 'Preparing Tomorrow's Workforce in Engineering' gan y cwmni Autodesk mewn partneriaeth â'r elusen hyfforddi sgiliau WorldSkillsUK.

Derbyniodd ein darlithwyr Bryn Jones, Eva Voma a Geraint Rowlands wahoddiad i siarad yn y gynhadledd, a oedd yn anelu at hyrwyddo manteision cystadlaethau sgiliau ym maes technolegau newydd.

Ymunodd tîm o ddarlithwyr a rheolwyr o bob rhan o Grŵp Llandrillo Menai â nhw ym mhencadlys gweithgynhyrchu Autodesk yn y DU yn Birmingham.

Yn ystod y gynhadledd trefnwyd cyfres o ddosbarthiadau meistr technegol a gynlluniwyd i gyflwyno technegau, profiadau a rhwydweithiau i addysgwyr a mentoriaid diwydiant fel bod modd iddynt ysbrydoli'r genhedlaeth nesaf o beirianwyr a dylunwyr cynnyrch.

Gofynnwyd i Bryn, Geraint ac Eva gymryd rhan a rhannu eu profiadau fel mentoriaid a chystadleuwyr mewn cystadlaethau sgiliau.

Mae Bryn a Geraint yn hyfforddwyr Worldskills UK ar gyfer y categorïau gweithgynhyrchu haen wrth haen ac electroneg ddiwydiannol, ac enillodd Eva fedal efydd mewn cystadleuaeth Worldskills UK yn y categori gweithgynhyrchu haen wrth haen.

Yn ystod eu sesiynau siaradodd Bryn a Geraint am y manteision mae myfyrwyr, prentisiaid ac addysgu yn profi wrth gymryd rhan mewn cystadlaethau, a sut bydd hyn o fantais i weithlu'r dyfodol.

Disgrifiodd Eva ei thaith o fod yn fyfyriwr i fod yn ddarlithydd yng Ngholeg Menai gan dynnu sylw arbennig at y profiad arbennig o gystadlu a'r hyn ddysgodd hi wrth gymryd rhan.

Roedd ei chyd-ddarlithydd yng Ngholeg Menai, Osian Roberts, yno hefyd a rhannodd ei brofiadau ei hun gan nodi sut gwnaeth cystadlu ei helpu i ddatblygu. Enillodd Osian fedal aur WorldSkills UK yn y categori CNC Turning yn 2023, ac fel Eva, mae’n gyn-fyfyriwr sydd bellach yn ddarlithydd ar gampws Llangefni.

Roedd pennaeth cynorthwyol Coleg Llandrillo, Damian Woodford yno hefyd, a'r rheolwr maes rhaglen peirianneg Tim Peel, ynghyd â darlithwyr o gampysau Llangefni a'r Rhyl.

Cawsant daith o amgylch pencadlys gweithgynhyrchu Autodesk, a chyfle i fynychu dosbarthiadau meistr amrywiol a fydd yn eu cynorthwyo i barhau i gynnig darpariaeth beirianneg o'r radd flaenaf yng Ngrŵp Llandrillo Menai.

Meddai Bryn: “Roedd yn ddiwrnod cadarnhaol iawn ac mi gawsom lawer o adborth da. Y syniad oedd ysbrydoli addysgwyr o bob cwr o'r DU a’u hysgogi i gymryd rhan mewn cystadlaethau sgiliau, a dangos y manteision o gymryd rhan, o safbwynt y darlithwyr ac o safbwynt y cystadleuwyr.

"Mi wnaethon ni ddangos sut y gall cymryd rhan mewn cystadlaethau fod o fudd nid yn unig i ddatblygiad y myfyrwyr, ond hefyd i waith bob dydd addysgwyr, o ran gwella adnoddau ac ysbrydoli safonau uwch.

Dywedodd rheolwr addysg Autodesk, Iwan Roberts, a fu gynt yn ddarlithydd yng Ngholeg Menai: “Roedd yn wych gweld cymaint o addysgwyr a gweithwyr proffesiynol y diwydiant yn dod at ei gilydd, yn awyddus i gyflwyno cystadlaethau WorldSkills i’w colegau a dod yn rhan o gymuned fywiog o ddysgwyr angerddol.

Diolch yn fawr iawn i’r siaradwyr o Grŵp Llandrillo Menai, Coleg Gŵyr a thri Phartner Dysgu Autodesk am eu gwaith a'u cyfraniadau arbennig. Roedd pob un yn ganolog i lwyddiant y digwyddiad.

Rydym yn ffodus iawn i gael unigolion mor ymroddedig yn y rolau hyn ar draws y DU, maen nhw'n ysbrydoli'r genhedlaeth nesaf drwy gynnig cyfleoedd anhygoel i fyfyrwyr ac yn cynorthwyo addysgwyr i baratoi gweithlu peirianneg y dyfodol.

Mae Autodesk yn gwmni sy'n arwain y byd ym maes creu meddalwedd ar gyfer effeithiau ffilm arbennig, gweithgynhyrchu a dylunio, ac adeiladu.

Yn 2023, rhoddodd y cwmni argraffydd 3D enfawr i Goleg Menai, i gydnabod gwaith arloesol yr adran beirianneg wrth ddefnyddio pecyn Fusion360 Autodesk i ddysgu dylunio a gweithgynhyrchu gyda chymorth cyfrifiadur.

Hoffech chi ddysgu rhagor am y cyffro sydd ynghlwm wrth beirianneg yng Ngrŵp Llandrillo Menai? Cewch ragor o wybodaeth am ein cyrsiau yma.