Cwrs Coleg Llandrillo'n arwain at yrfa newydd i Ceri

Mae Ceri Thomas yn falch ei bod wedi dilyn ei breuddwyd ac wedi cofrestru ar gwrs Trin Gwallt yng Ngholeg Llandrillo. ⁠ ⁠

Mae’r ferch 39 oed o Fae Penrhyn newydd orffen blwyddyn gyntaf ei hyfforddiant, ond eisoes wedi cyrraedd rownd derfynol cystadleuaeth genedlaethol.

Ar hyn o bryd mae Ceri yn gweithio fel dosbarthwr fferyllol, a chyn hynny roedd yn gweithio fel gweithiwr cymorth adsefydlu ar gyfer unigolion ag anghenion cymhleth oedd wedi cael anaf i’r ymennydd.

Penderfynodd y llynedd fod yr amser yn iawn i newid cyfeiriad - ac o fewn chwe mis i ddechrau ar y cwrs Trin Gwallt, Lefel 1 yn salon Llandrillo-yn-Rhos Coleg Llandrillo, cyrhaeddodd Ceri rownd derfynol cystadleuaeth Dysgwr Cysyniad y Flwyddyn.

Er na ddaeth yn fuddugol, dywedodd Ceri fod y profiad yn “anhygoel” ac mi gadarnhaodd ei bod wedi gwneud y penderfyniad cywir i ddilyn cwrs trin gwallt.

Mae’n dychwelyd i’r coleg ym mis Medi i symud ymlaen i Lefel 2, ac yn gweithio i wireddu ei breuddwyd o fod â gofal am ei gyrfa ei hun.

“Dw i'n mwynhau'n arw,” meddai Ceri. “Rydw i wastad wedi bod â diddordeb mewn trin gwallt ac roeddwn i'n mynd i ddod i'r coleg ar ôl gorffen yn yr ysgol.

Ond mi benderfynais fynd i ddilyn y llwybr Lefel A a dechrau gweithio yn syth. Ugain mlynedd yn ddiweddarach, gydag ychydig o newidiadau gyrfa, diswyddiadau a phlentyn pedair blwydd oed yn tynnu sylw, mi benderfynais mai rŵan oedd yr amser i wneud hynny.

Byddwn yn annog unrhyw un i wneud yr un peth. Dim ond unwaith byddwn ni yma, ac mi ddylen ni wneud rhywbeth rydym yn angerddol drosto. Dw i'n edrych ymlaen yn arw at gymhwyso a dechrau ar yrfa ble bydd gen i reolaeth lwyr drosto."

Mae Ceri yn cadw ei hopsiynau'n agored o ran yr hyn y bydd yn ei wneud unwaith y bydd wedi gorffen ei hyfforddiant. Fodd bynnag, mae hi'n ystyried mynd i gyfeiriad steilio theatrig a steilio ar gyfer priodasau.

Dywedodd: “Dw i heb benderfynu eto pa lwybr y bydda i'n ei ddilyn Ar hyn o bryd mae gen i ddiddordeb mewn dysgu rhagor am steilio theatrig a steilio gwallt gosod. Pe bawn i'n gallu gwneud bywoliaeth o greu gwallt gosod anferth a gwych ar gyfer perfformwyr drag, byddai hynny'n anhygoel!

“Mae gen i ddiddordeb hefyd mewn gwallt priodas a gwallt ar gyfer achlysuron arbennig, a lliwiau llachar. Llawer i feddwl amdano felly, a llawer i'w ddysgu dros y blynyddoedd nesaf. Rwy’n gyffrous iawn am y dyfodol, a ble bydd fy nhaith trin gwallt yn mynd a fi.”

Gallwch weld enghreifftiau o waith Ceri ar ei thudalen Instagram.

Ydych chi eisiau gweithio ym maes trin gwallt, barbwr neu therapi harddwch? Cliciwch yma i gael rhagor o wybodaeth am gyrsiau Grŵp Llandrillo Menai