Adroddiad Diweddar gan Estyn yn Canu Clodydd Grŵp Llandrillo Menai
Yn dilyn arolygiad diweddar gan Estyn, canmolwyd sawl agwedd ar ddarpariaeth Addysg Bellach Grŵp Llandrillo Menai, yn enwedig ei wasanaethau i ddysgwyr.
Yn yr adroddiad tynnodd Estyn, arolygiaeth addysg a hyfforddiant Cymru, sylw at nifer o ganfyddiadau cadarnhaol oedd yn cynnwys saith enghraifft o arferion da ac arloesi ar ei gampysau.
Canmolodd yr adroddiad y Grŵp am ansawdd y profiadau dysgu ac addysgu yr oedd yn eu cynnig, gan ddweud “bod gan yr athrawon wybodaeth dda a phrofiad yn eu pynciau, eu bod yn gyfeillgar a hawdd siarad â nhw, a'u bod yn rhoi cefnogaeth dda i'w dysgwyr”.
Nododd yr Arolygwyr hefyd: “bod dysgu ac addysgu dwyieithog yn nodwedd gref ac amlwg o'r coleg”. Mae'r athrawon yn cynllunio ac yn cyflwyno gwersi dwyieithog yn fedrus ac yn “batrwm da o sut i ddefnyddio'r ddwy iaith... mae iaith y dysgu'n symud yn rhwydd rhwng y Gymraeg a’r Saesneg”.
Ychwanegodd yr adroddiad, “ar bob campws ceir diwylliant croesawgar, agored a pharchus lle mae amrywiaeth yn cael ei ddathlu, a'r staff a'r dysgwyr yn meithrin perthynas gadarnhaol â'i gilydd”.
Canmolodd Estyn hefyd y cymorth sydd ar gael i ddisgyblion ysgol sy’n trosglwyddo i’r coleg, gan gydnabod bod y coleg wedi “cryfhau ei berthynas â’r awdurdodau lleol a'r ysgolion yn sylweddol... o ganlyniad, mae llawer o ddysgwyr yn dweud eu bod yn teimlo eu bod yn cael eu cefnogi’n dda yn ystod y broses bontio hon”.
Aeth yr adroddiad ymlaen i ddweud bod “y dysgwyr yn elwa ar fynediad at ystod eang o wasanaethau cymorth sy’n addas iawn i’w hanghenion yn ystod eu cyfnod yn y coleg, gan gynnwys cwnsela, cymorth llesiant, ymarferydd iechyd meddwl a nyrs. Maent yn gwerthfawrogi'r amrywiaeth o weithgareddau cyfoethogi sy'n cynnwys clybiau amser cinio, sesiynau lles actif, cystadlaethau sgiliau, tripiau, ymweliadau a siaradwyr gwadd.”
Ar ben hynny, cafodd Uwch Arweinwyr a Chorff Llywodraethu Grŵp Llandrillo Menai eu cydnabod am lwyddo i “sefydlu a chynnal y pwyslais ar ansawdd profiad y dysgwyr ac ar anghenion y cymunedau y mae’r Grŵp yn eu gwasanaethu.”
Esboniodd Dafydd Evans, Prif Weithredwr Grŵp Llandrillo Menai,
“Rydym wrth ein bodd gyda chanfyddiadau’r adroddiad arolygu, sy’n cadarnhau ein hymrwymiad diwyro i ddarparu addysg ragorol a chefnogaeth gadarn i’n dysgwyr.
“Trwy roi cydnabyddiaeth i'n haddysg ddwyieithog ragorol, ein datblygiad proffesiynol, ein harferion cynaliadwy, a'n gwasanaethau cynhwysfawr i fyfyrwyr mae Estyn yn tanlinellu'r rôl flaenllaw sydd gennym mewn addysg bellach.
“Rydym yn ymroddedig i gynnig addysg o ansawdd uchel a meithrin amgylchedd lle gall dysgwyr ffynnu, a byddwn yn parhau i adeiladu ar y cryfderau hyn er mwyn sicrhau’r canlyniadau gorau posibl wrth i ni ymdrechu i gyflawni ein cenhadaeth o wella dyfodol pobl.”
Mae’r Adroddiad llawn ar y Ddarpariaeth Addysg Bellach yng Ngrŵp Llandrillo Menai, a baratowyd gan Estyn, i’w weld yma.
