Coleg Meirion-Dwyfor yn Dathlu Llwyddiant ei Fyfyrwyr
Ddoe yn seremoni wobrwyo flynyddol Coleg Meirion-Dwyfor dathlwyd llwyddiannau 15 o ddysgwyr arbennig iawn.
Daeth yr enillwyr ynghyd ym Mhlas Tan y Bwlch, Maentwrog i ddathlu eu llwyddiant gyda'u teulu a'u ffrindiau.
Gwahoddir darlithwyr o bob maes pwnc i enwebu myfyrwyr am wobr, a Rheolwr y Maes Rhaglen sydd wedyn yn dewis yr enillydd ar gyfer y ddisgyblaeth honno. Yna mae'r Pennaeth yn dewis y Prif Enillydd ar sail ei lwyddiant academaidd a'r hyn a gyflawnodd.
Y myfyriwr Safon Uwch, Olaf Niechcial enillodd y brif wobr sef Myfyriwr y Flwyddyn, a derbyniodd dlws a siec am £100.
Mae Olaf o Dremadog wedi dangos dawn eithriadol drwy ennill y wobr aur yn her fathemategol hŷn UKMT am ddwy flynedd yn olynol, a chafodd y wobr Deilyngdod yng nghystadleuaeth yr Andrew Jobbings Senior Kangaroo.
Mae Olaf wedi derbyn cynnig gan Brifysgol Rhydychen i astudio Mathemateg a bydd yn mynd yno ym mis Medi.
Dywedodd Olaf,
"Mae'n fraint derbyn y wobr yma. Mae Coleg Meirion-Dwyfor wedi bod yn gefnogol iawn i mi yn ystod fy nghyfnod yma. Mae'r coleg wedi agor cyn-gymaint o ddrysau ac wedi cyflwyno llawer o gyfleoedd newydd i mi."
Dyma restr lawn o'r enillwyr eleni:Safon Uwch (Gwyddorau) a Myfyriwr y Flwyddyn: Olaf Niechcial
Safon Uwch (Dyniaethau): Ela Rhys
Celf a Dylunio: Catrin Williams
Busnes: Euron Jones
Astudiaethau Plentyndod a Gofal Iechyd: Siwan Jones
TGCh: Dylan Jackson
Peirianneg: Ned Pugh
Adeiladu: Dyfan Jones
Gwallt a Harddwch: Kaitlyn Donald
Iechyd a Gofal Cymdeithasol: Taylor Rahilly
Lletygarwch ac Arlwyo: Jack Williams
Sgiliau Byw’n Annibynnol: James Fear
Myfyriwr Cymraeg y Flwyddyn: Ela Haf Jones
Tarian Chwaraeon Robin Llŷr Evans: Mared Griffiths
Gwobr Goffa Glesni Davies: Cadi Davies Rogers
Canmolodd Aled Jones-Griffith, Pennaeth Coleg Menai a Choleg Meirion-Dwyfor yr enillwyr, gan ddweud,
“Llongyfarchiadau i bawb sydd wedi ennill gwobr eleni. Mae wedi bod yn fraint cael cyflwyno'r gwobrau nodedig hyn i griw o fyfyrwyr sydd wedi gweithio mor galed ac wedi dangos gymaint o ymroddiad a brwdfrydedd.
“Maen nhw'n dysteb i'n cenhadaeth o ‘Wella Dyfodol Pobl’ ac yn dysteb hefyd i gefnogaeth eu darlithwyr a'u tiwtoriaid personol. Da iawn bawb.”
