Osian yn llawn canmoliaeth i'r coleg

Mae Osian Roberts wedi canmol Coleg Menai ar ôl iddo ennill medal aur ym mhencampwriaethau WorldSkills.

Mae wedi bod yn flwyddyn lwyddiannus i Osian, sy’n astudio ar gyfer Tystysgrif Genedlaethol Uwch mewn Peirianneg Gyffredinol fel rhan o’i brentisiaeth gyda chwmni gweithgynhyrchu IAQ.

Y myfyriwr 24 oed oedd enillydd y categori Turnio CNC yn rowndiau terfynol cystadleuaeth WorldSkills UK ym Manceinion fis Tachwedd.

Er mwyn cyrraedd y rowndiau terfynol bu’n rhaid iddo orffen yn y pump uchaf yn y DU yn rowndiau rhanbarthol yr haf – ar ôl iddo hefyd hawlio’r trydydd safle yng Nghystadleuaeth Sgiliau Cymru yn gynharach yn y flwyddyn.

Cyflawnodd Osian hyn wrth astudio un diwrnod yr wythnos ochr yn ochr â’i rôl fel gweithredwr canolfan durnio CNC cwmni IAQ yn ei dref enedigol, Caernarfon.

Mae ei gyflawniadau hyd yn oed yn fwy trawiadol o ystyried ei fod yn defnyddio meddalwedd hollol wahanol i Autodesk Fusion 360, a ddefnyddir yn y cystadlaethau sgiliau, wrth ei waith bob dydd.

Ond dangosodd ei ddawn wrth ddefnyddio’r feddalwedd ar ôl cwrs carlam gan y darlithydd Iwan Roberts yng nghanolfan beirianneg Coleg Menai yn Llangefni, ac enillodd fedal aur y DU i orffen 2023 mewn steil.

Dywedodd Osian: “Siaradodd Iwan Roberts, fy nhiwtor yma yng Ngholeg Menai, gyda ni fel grŵp am gystadleuaeth sgiliau mewn Turnio CNC.

"Roedd yn meddwl, gan mai dyna dwi’n ei wneud yn y gwaith, byddai gen i siawns dda. Doeddwn i ddim yn gyfarwydd â'r feddalwedd gyfrifiadurol, ond roedd yn gyfle da i mi gystadlu ac arddangos fy sgiliau.”

Ystyr CNC yw Rheolaeth Rhifiadol Cyfrifiadurol ac mae'n cyfeirio at y term ehangach ar gyfer proses weithgynhyrchu a arweinir gan raglen gyfrifiadurol.

Mae rhannau'n cael eu dylunio a'u datblygu gan ddefnyddio CAD (Dylunio gyda Chymorth Cyfrifiadur). Yna defnyddir y ffeil CAD hon i gynhyrchu rhaglen gyfrifiadurol sy'n rheoli'r peiriant turnio CNC, sy'n defnyddio turnau i beiriannau cydrannau o ddeunyddiau amrywiol fel alwminiwm, pres, a dur di-staen.

Yn rownd derfynol WorldSkills UK, cafodd Osian y dasg o wneud cydran alwminiwm i safonau diwydiannol manwl gywir. Ar ôl cael model tri dimensiwn o’r rhan yr oedd angen iddo ei chreu, cafodd Osian ddwy awr o amser rhaglennu cyfrifiadurol, a dwy awr a hanner i beiriannu’r rhan.

Dywedodd: “Dw i'n teimlo’n hapus ac yn falch fy mod wedi ennill y fedal aur – mi ges i sioc hefyd!

"Roedd y gefnogaeth ges i gan fy nhiwtoriaid yma yn arbennig. Mae Iwan Roberts wedi rhoi’r gefnogaeth a’r cymorth mwyaf i mi drwy gydol y gystadleuaeth, a hoffwn ddiolch i bawb o IAQ am roi’r cyfle i mi gystadlu.

"Mae’r cystadlaethau hyn yn wych ar gyfer y CV yn amlwg, ond mae hefyd yn dda gweld lefel myfyrwyr coleg eraill a phrentisiaid eraill er mwyn gwybod fy mod yn rhagori ar yr hyn dw i’n ei wneud ar hyn o bryd ac mi alla i fod yn falch o hynny."

Mae Osian wedi datblygu llawer ers ymuno ag IAQ a dechrau ei astudiaethau yng Ngholeg Menai, ac mae’n bwriadu symud ymlaen i ddilyn prentisiaeth gradd.

Dywedodd: “Cyn dechrau fy mhrentisiaeth doedd gen i ddim profiad na chymwysterau blaenorol yn ymwneud â pheirianneg. Roeddwn i'n gwybod fy mod eisiau gwneud rhywbeth ymarferol ac mi welais gyfle am brentisiaeth yn fy nghwmni, mi wnes i gais, cael y swydd a symud ymlaen o hynny.

"Fel prentis, rydw i'n gweithio gydag ochr Turnio CNC y cwmni. Dw i'n peiriannu rhwng 20 a 50 o wahanol rannau bob dydd, ac rydyn ni'n brysur iawn drwy'r amser.

"Mae rheoli a chydbwyso llwyth gwaith ychwanegol yn hanfodol wrth astudio fel prentis a gwneud gwaith y coleg ar yr un pryd – peidio â gadael holl waith y coleg i’r naill ochr a dim ond gweithio, neu wneud y gwrthwyneb i hynny. Fel hyn mae hi - gwnewch y gwaith ac mae'r cyfan yn dod yn naturiol."

Wrth ofyn am ei gyngor i unrhyw fyfyrwyr sy’n ystyried cymryd rhan mewn cystadlaethau sgiliau, dywedodd Osian: “Ewch amdani, does dim byd i'w golli. Mae’r profiadau a’r sgiliau y byddwch chi’n eu dysgu o fudd mawr i chi.”

Gallwch wylio Osian wrth ei waith a gweld ei gyfweliad llawn yma.

Eisiau dysgu rhagor am fyd cyffrous peirianneg gyda Grŵp Llandrillo Menai? I gael rhagor o wybodaeth am ein cyrsiau, cliciwch yma.