Myfyrwyr yn gwylio 'Stori Olivia' - ffilm bwerus am ddiogelwch ar y ffyrdd

Gwyliodd myfyrwyr ar gampysau Grŵp Llandrillo Menai ffilm bwerus am ferch yn ei harddegau a gafodd ei lladd mewn damwain car.

Bu farw Olivia Alkir, o Efenechtyd ger Rhuthun, yn 2019 yn dilyn gwrthdrawiad a achoswyd gan ddau yrrwr ifanc yn rasio. Dim ond 17 oed oedd hi.

Mae ‘Stori Olivia’ yn ffilm dorcalonnus sy'n adrodd digwyddiadau'r ddamwain, lle cafodd dau o'i ffrindiau hefyd anafiadau a newidiodd eu bywydau.

Ers marwolaeth Olivia mae ei mam, Jo Alkir, wedi bod yn ymgyrchu dros osod blwch du yng nghar pob person ifanc i fonitro gyrru ac i geisio atal rhagor o drychinebau fel hyn.

Cynhyrchwyd ‘Stori Olivia’ fel rhan o'r ymgyrch honno, ar y cyd â Heddlu Gogledd Cymru, Gwasanaeth Tân ac Achub Gogledd Cymru ac asiantaethau eraill.

Mae'r ffilm yn cynnwys lluniau dash-cam o gerbyd arall nad oedd yn rhan o'r ddamwain, yn ogystal â recordiadau o'r alwad 999, a chyfweliadau â rhieni a ffrindiau Olivia.

Cafodd ‘Stori Olivia’ ei dangos yr wythnos diwethaf fel rhan o Wythnos Llesiant ‘Cadw’n Ddiogel’ Grŵp Llandrillo Menai. Cafodd y ffilm ei dangos ar gampws Coleg Llandrillo yn Llandrillo-yn-Rhos, ar gampws Coleg Meirion-Dwyfor yn Nolgellau a champws Coleg Menai yn Llangefni.

Ochr yn ochr â’r ffilm, cyflwynodd swyddogion o Wasanaeth Tân ac Achub Gogledd Cymru wers yn cynnwys trafodaeth ar y ‘5 Angheuol’ sef y prif ffactorau sy’n achosi gwrthdrawiadau difrifol ar y ffyrdd. Y 5 Angheuol yw:

• Gyrru'n ddiofal a pheryglus
• Yfed a gyrru a gyrru dan ddylanwad cyffuriau
• Peidio â gwisgo gwregys diogelwch
• Defnyddio ffôn symudol
• Goryrru

Daeth nifer dda o fyfyrwyr o amrywiaeth eang o gyrsiau i'r sesiynau, gan gynnwys Iechyd a Gofal Cymdeithasol, Chwaraeon, TG, Gwasanaethau Cyhoeddus, Safon Uwch ac Adeiladu.

Dywedodd Olivia Longman, sydd ar ail flwyddyn ei chwrs Lefel 3 mewn Iechyd a Gofal Cymdeithasol yng Ngholeg Menai, Llangefni: “Mi wnaeth i mi sylweddoli pa mor hawdd mae damweiniau’n digwydd a dydyn ni ddim bob amser yn deall pa mor ddifrifol yw'r canlyniadau. Y tro nesaf y bydda i'n teithio mewn car rydw i am roi mwy o feddwl i bwy sy'n gyrru.”

A dywedodd Jason David Griffiths, myfyriwr blwyddyn gyntaf y cwrs Lefel 3 mewn Iechyd a Gofal Cymdeithasol Lefel yn Llangefni: “Roedd y sesiwn yn ddefnyddiol oherwydd roedd yn agor llygaid llawer o bobl ifanc i bwysigrwydd diogelwch ar y ffyrdd a pheryglon gyrru’n ddi-hid.”

Dywedodd Aaron Beacher, Swyddog Cyfoethogi Profiadau Myfyrwyr Grŵp Llandrillo Menai: “Mae mor bwysig fod y sesiwn yma'n cael ei chyflwyno i holl fyfyrwyr Grŵp Llandrillo Menai.

“Yr wythnos hon, cyflwynodd Gwasanaeth Tân ac Achub Gogledd Cymru a Heddlu Gogledd Cymru ‘Stori Olivia’ i dros 400 o ddysgwyr ledled y Grŵp. Mae mor bwysig ein bod yn addysgu ein hunain ac yn bod mor ofalus â phosib wrth deithio mewn car, boed hynny fel teithwyr neu fel gyrwyr.

“O glywed yr hyn oedd gan y dysgwyr i'w ddweud am y sesiwn, mae'n amlwg iawn fod ‘Stori Olivia’ yn bwerus ac effeithiol.

“Yn ystod yr wythnosau nesaf byddaf yn gweithio gyda Gwasanaeth Tân ac Achub Gogledd Cymru a Heddlu Gogledd Cymru i drefnu dyddiadau ychwanegol ar gyfer y flwyddyn nesaf fel y gallwn gyflwyno’r neges rymus hon am ddiogelwch ffyrdd i fwy o ddysgwyr y Grŵp.

“Hoffwn ddiolch i’r holl staff a gymerodd ran am wneud yr wythnos yn llwyddiant mawr, ac yn enwedig i Wasanaeth Tân ac Achub Gogledd Cymru a Heddlu Gogledd Cymru.”

Dywedodd Pam Roberts, Rheolwr Gwylfa Diogelwch Tân Gwasanaeth Tân ac Achub Gogledd Cymru: “Mae cymryd rhan yn wythnos Llesiant Coleg Llandrillo yn ffordd wych i ni gysylltu â gyrwyr ifanc ar draws y rhanbarth.

“Dydi gwaith y gwasanaeth tân ac achub ddim yn unig yn golygu mynd i’r afael â thanau mewn tai – rydyn ni'n delio â llawer o wrthdrawiadau ar y ffyrdd ac yn gweithio’n ddiflino gydag asiantaethau eraill i helpu i addysgu gyrwyr am ganlyniadau angheuol posibl goryrru neu beidio â thalu sylw wrth yrru.

“Mae llawer o dystiolaeth bod gyrwyr ifanc 16-24 oed yn fwy tebygol o gael eu hanafu mewn gwrthdrawiadau ar y ffyrdd. Yng Nghymru, mae'r grŵp oedran hwn yn gyfrifol am 11 y cant o'r boblogaeth ond 22 y cant o'r holl anafiadau.

“Mae ein diolch yn fawr i Grŵp Llandrillo Menai am weithio gyda ni i helpu i addysgu gyrwyr ifanc ar draws gogledd Cymru.”

Dywedodd PC Jon Hewitt o Uned Troseddau Ffyrdd Heddlu Gogledd Cymru: “Mae Stori Olivia yn wirioneddol dorcalonnus a nod y ffilm bwerus hon yw helpu i addysgu pobl ifanc am bwysigrwydd cadw’n ddiogel ar y ffordd.

“Yn anffodus, mae gyrwyr ifanc yn llawer mwy tebygol o fod mewn gwrthdrawiadau, yn aml oherwydd diffyg profiad a diffyg gwybodaeth am y risgiau. Mae’r ffilm hon yn targedu gyrwyr newydd a'r rhai sy'n dysgu gyrru a’r nod yw eu helpu i fod yn ymwybodol o’u cyfrifoldebau ac o’r canlyniadau dinistriol a all ddigwydd.”

Bydd Gwasanaeth Tân ac Achub Gogledd Cymru a Heddlu Gogledd Cymru yn dychwelyd yn gynnar y flwyddyn nesaf i gyflwyno rhagor o sesiynau ar gampysau Grŵp Llandrillo Menai. Ceir rhagor o fanylion am hyn dros yr wythnosau nesaf.

Mae ‘Stori Olivia’ yn cael ei dangos mewn colegau ac ysgolion i wella ymwybyddiaeth o ddiogelwch ar y ffyrdd ymhlith pobl ifanc, a chafodd ei ddangos hefyd yn y Senedd yn San Steffan yn gynharach eleni.

I gael rhagor o wybodaeth am ‘Stori Olivia’ a’r ymgyrch i osod blwch du yng nghar pob person ifanc, ewch i Olivia Alkir – In Olivia's memory